coimbatore school girl death: நவ. 26 வரை பள்ளியின் முதல்வருக்கு நீதிமன்றக் காவல்

12ஆம் வகுப்புப் பள்ளி மாணவி தற்கொலை செய்துகொண்ட விவகாரத்தில் அவர் முதலில் படித்த தனியார் பள்ளியின் முதல்வர் நீதிமன்றக் காவலில் வைக்க நீதிபதி உத்தரவிட்டுள்ளார்.

கோவை: கோயம்புத்தூர் மாவட்டத்தில் உக்கடம் பகுதியில் உள்ள தனியார் பள்ளியில் 12ஆம் வகுப்புப் பயின்றுவந்த மாணவி ஆசிரியரின் பாலியல் தொல்லையால் (நவ. 11) தூக்கிட்டுத் தற்கொலை செய்துகொண்டார். இதனையடுத்து பெற்றோர் காவல் துறையினரிடம் புகார் அளித்தனர்.

விசாரணையில், அப்பள்ளியின் இயற்பியல் ஆசிரியர் தொடர் பாலியல் துன்புறுத்தலே தங்களது மகளின் தற்கொலைக்குக் காரணம் என மாணவியின் பெற்றோர் புகார் தெரிவித்தனர். இத்துடன் மாணவி தற்கொலை செய்வதற்கு முன்பு எழுதிவைத்த கடிதத்தில் மூவரின் பெயர்களைக் குறிப்பிட்டுள்ளதாகக் கூறப்படுகிறது.

12ஆம் வகுப்புப் பள்ளி மாணவி தற்கொலை

அந்த மாணவி ஆசிரியரால் தொடர்ந்து பாலியல் தொல்லைக்கு உள்ளாகியதாகவும் பள்ளி நிர்வாகத்திடம் இதனைப் பற்றி புகார் தெரிவித்தும்கூட அவர்கள் எவ்வித நடவடிக்கையும் எடுக்காததால் கடும் மன உளைச்சலுக்கு ஆளாகி தற்கொலை செய்துகொண்டார் எனவும் தெரியவந்துள்ளது.

இதனையடுத்து நவம்பர் 12 ஆசிரியர் மீது தற்கொலைக்குத் தூண்டுதல், போக்சோ சட்டத்தில் இரண்டு பிரிவுகள் என மொத்தம் மூன்று பிரிவுகளின்கீழ் வழக்குப்பதிந்து பின்னர் சிறையில் அடைத்தனர்.

இந்த விவகாரத்தில் தலைமறைவாக இருந்த தனியார் பள்ளியின் முதல்வர் மீது போக்சோ சட்டப்பிரிவின்கீழ் வழக்குப்பதிந்து நிலையில், தனிப்படை காவல் துறையினர் பெங்களூருவில் வைத்து நவம்பர் 14ஆம் தேதி கைதுசெய்தனர்.

இச்சூழலில், உயிரிழந்த மாணவியின் உடலை அவரது பெற்றோர் உடற்கூராய்வு நிறைவடைந்த பின் நேற்று பெற்றுக்கொண்டனர். இதனையடுத்து நேற்று ஆர்.எஸ். புரம் அனைத்து மகளிர் காவல் நிலையத்திலிருந்து நீதிபதி இல்லத்திற்கு அழைத்துச் செல்லப்பட்டார்.

பள்ளி முதல்வர்

இதனையடுத்து கோவை மகளிர் நீதிமன்றம் நீதிபதி நந்தினி தேவி முன்பு முன்னிறுத்தப்பட்ட பள்ளியின் முதல்வரை வரும் 26ஆம் தேதி வரை நீதிமன்றக் காவலில் வைக்க உத்தரவு பிறப்பிக்கப்பட்டது. இதன் அடிப்படையில் அவர் கோவை மத்திய சிறைச் சாலையில் அடைக்கப்பட்டார்.

இதையும் படிங்க:மாணவியின் இறுதி ஊர்வலம் - கண்ணீர்விட்ட கோவை மக்கள்