கோயம்புத்தூர்: அன்னூர் மற்றும் அதன் சுற்று வட்டார கிராமங்களில் விவசாயம் பிரதான தொழிலாக உள்ளது. அதேநேரம் இந்த பகுதிகளில் புல்வெளிகள் நிறைந்த மேய்ச்சல் நிலங்கள் அதிகம் உள்ளதால், கால்நடைகள் அதிக அளவில் வளர்க்கப்பட்டு வருகின்றன. அதேபோல் வாரந்தோறும் சனிக்கிழமை நடைபெறும் அன்னூர் சந்தையில், விவசாயிகள் தங்கள் ஆடுகளை விற்பனை செய்வது வழக்கமான ஒன்று.
இந்த நிலையில் ரம்ஜான் பண்டிகைக்கு சில நாட்களே உள்ள நிலையில், வார இறுதி நாளான இன்று (ஏப்ரல் 15), அன்னூர் சந்தையில் அதிகாலை 5 மணி முதலே ஆடுகள் விற்பனை களைகட்டத் தொடங்கியது. இங்கு ஆட்டுச் சந்தை தொடங்கியதும் வியாபாரிகள் போட்டி போட்டுக் கொண்டு ஆடுகளை வாங்கிச் சென்றனர்.
குறிப்பாக கோவை, ஈரோடு, திருப்பூர் மற்றும் நீலகிரி ஆகிய மாவட்டங்களில் இருந்தும், கர்நாடகா மற்றும் கேரளா போன்ற அண்டை மாநிலங்களில் இருந்தும் ஆடுகளை வாங்க ஏராளமான வியாபாரிகள் வந்தனர்.