தந்தைக்கு நடனமாடி வாக்குச் சேகரித்த அக்சரா, சுஹாசினி

கோவை தெற்குத் தொகுதியில் போட்டியிடும் மக்கள் நீதி மய்யம் தலைவர் கமல் ஹாசனுக்கு ஆதரவாக அவரது மகள்களான அக்சரா ஹாசன், சுஹாசினி ஆகியோர் நடனமாடி வாக்குச் சேகரிப்பில் ஈடுபட்டனர்.

கோவை: தமிழ்நாடு முழுவதும் இன்று இறுதிகட்ட பரப்புரை தீவிரமடைந்துள்ள நிலையில், வேட்பாளர்கள் ஒருபுறம், அவர்களது ஆதரவாளர்கள் ஒருபுறம் என்று தீவிர வாக்குச் சேகரிப்பில் ஈடுபட்டுள்ளனர்.

இந்நிலையில் கோவை தெற்குச் சட்டப்பேரவைத் தொகுதியில் போட்டியிடும் மக்கள் நீதி மய்யத்தின் வேட்பாளர் கமல் ஹாசனுக்கு ஆதரவாக அவரது மகள் அக்‌சரா ஹாசன், அவரது அண்ணன் மகள் சுஹாசினி ஆகியோர் இன்று(ஏப்.4) காந்திபுரம் ராம்நகர் பகுதியில் வாக்குச் சேகரிப்பில் ஈடுபட்டனர்.

அப்பகுதியில் உள்ள ராமர் கோயிலில் சாமி தரிசனம் செய்துவிட்டு நடந்துசென்று வாக்குச் சேகரிப்பில் ஈடுபட்ட அவர்கள் மக்களைச் சந்தித்து டார்ச் லைட் சின்னத்தில் வாக்களிக்கும்படி கேட்டுக்கொண்டனர்.

அவர்களுடன் பொதுமக்கள் புகைப்படங்கள் எடுத்துக் கொண்டனர். அதனைத் தொடர்ந்து அம்மன்குளம் பகுதிக்குச் சென்ற அவர்கள் கமல் ஹாசனுக்கு ஆதரவாக நடனமாடி வாக்குச் சேகரித்தனர்.