கோயம்புத்தூர், பாஜக அலுவலகத்தில் செய்தியாளர்களை சந்தித்த அக்கட்சியின் மாநில பொதுச் செயலாளர் வானதி சீனிவாசன், கிளைத் தேர்தல் இந்த மாதம் நடைபெறும் என்றும் அதில் அவசியம் ஒரு மகளிர் இருக்க வேண்டுமென கேட்டுள்ளதாக கூறினார்.
மேலும் பேசிய அவர், பாஜக ஆட்சியில் காஷ்மீர் விவகாரம் தொடர்பாக ஆதரவு கரங்களை ஒன்றிணைக்கவும், விழிப்புணர்வு ஏற்படுத்தவும் மத்திய அமைச்சர்கள், மாநில நிர்வாகிகள் பங்கேற்கும் கூட்டம் நடத்தப்பட உள்ளது. மாநில தலைவருக்கான தேர்தல் நவம்பரில் நடைபெறும் நிலையில் தமிழ்நாட்டிற்கான மாநில தலைவரை, இடையில் அறிவிக்க வாய்ப்புள்ளதாக தெரிவித்தார்.
தொடர்ந்து, ஜாப் ஆர்டருக்கான 5 விழுக்காடு ஜி.எஸ்.டி-யை குறைக்க மத்திய நிதி அமைச்சரிடமும், மாநில அமைச்சரிடமும் கேட்டுள்ளதாக தெரிவித்த அவர், நாட்டில் உற்பத்தி இழப்பு என்பது ஒன்றும் இல்லை, உற்பத்தி சற்று பாதிப்பை மட்டுமே சந்தித்துள்ளது என்றார்.