தீவிர உடல்நலக்கோளாறு காரணமாக வடமாநில இளைஞர் தற்கொலை

சென்னையில் தீவிர உடல்நலக்கோளாறு காரணமாக மருத்துவமனையில் சிகிச்சைப்பெற்று வந்த வடமாநில இளைஞர், மருத்துவமனை வளாகத்திலேயே தற்கொலை செய்து கொண்டார்.

சென்னை: உத்தரப் பிரதேச மாநிலத்தைச் சேர்ந்தவர், நீலேஷ் குமார் (31). இவர் சென்னை சூளைமேடு பகுதியில் வசித்து, தனியார் வங்கியில் மேலாளராக பணி புரிந்து வந்தார். இவர் கடந்த சில நாள்களாக உடல் நலக்குறைவால் அவதியுற்று வந்துள்ளார்.

இதனால் சிகிச்சைக்காக ஜனவரி 23ஆம் தேதி அமைந்தகரை நெல்சன் மாணிக்கம் சாலையில் உள்ள தனியார் மருத்துவமனையில் அனுமதிக்கப்பட்டார். அங்கு நீலேஷ் மன உளைச்சலில் இருந்து வந்ததாக கூறப்படுகிறது. இந்த நிலையில்,நேற்று (ஜன 26) மாலை திடீரென மருத்துவமனை வாளகத்திலேயே தற்கொலை செய்துகொண்டார்.

தற்கொலை தீர்வல்ல

இது குறித்து மருத்துவமனை நிர்வாகம் அமைந்தகரை காவல் நிலையத்திற்குத் தகவல் தெரிவித்தனர். இந்த தகவலின் பேரில் சம்பவ இடத்திற்கு விரைந்த காவல்துறையினர், நீலேஷ் குமாரின் உடலை மீட்டு உடற்கூராய்வுக்காக கீழ்ப்பாக்கம் அரசு மருத்துவமனைக்கு அனுப்பி வைத்தனர். இதுகுறித்து வழக்குப் பதிவு செய்த காவல்துறையினர், உடல் நலப் பிரச்னை காரணமாக தற்கொலை செய்து கொண்டாரா அல்லது வேறு காரணமா என விசாரணை மேற்கொண்டு வருகின்றனர்.