துணைவேந்தர் சூரப்பா மீதான ஊழல் புகார்: மின்னஞ்சல் மூலம் புகார் தெரிவிக்கலாம்

சென்னை: அண்ணா பல்கலைக்கழகத்தின் துணைவேந்தர் சூரப்பா மீதான முறைகேடுகள் குறித்து மின்னஞ்சல் மூலமும், நேரிலும் புகார் தெரிவிக்கலாம் என ஓய்வுபெற்ற நீதிபதி கலையரசன் தெரிவித்துள்ளார்.

அண்ணா பல்கலைக்கழக துணைவேந்தர் சூரப்பா மீது 280 கோடி ரூபாய் ஊழல் முறைகேடு புகார்கள் வந்தன. இதனைத்தொடர்ந்து இதுதொடர்பாக விசாரிக்க சென்னை உயர் நீதிமன்றத்தின் ஓய்வுபெற்ற நீதிபதி கலையரசன் தலைமையில் விசாரணை ஆணையத்தை நியமித்து தமிழ்நாடு அரசு உத்தரவிட்டது.

சூரப்பா மீதான முறைகேடுகள் குறித்து விசாரிப்பதற்காக விக்னேஷ் சாலையிலுள்ள பொதிகை வளாகத்தில் விசாரணை அலுவலகம் அமைக்கப்பட்டுள்ளது. விசாரணை ஆணையத்துக்கு உதவ, உயர் கல்வித் துறை துணைச் செயலாளர் சங்கீதா, ஊழல் தடுப்பு மற்றும் கண்காணிப்புத் துறை எஸ்.பி. பொன்னி, உயர் நீதிமன்ற சிறப்பு அரசு வழக்கறிஞர் கார்த்திகேயன், வழக்கறிஞர் சாய் பிரசாத், ஓய்வுபெற்ற நீதித் துறை கூடுதல் செயலாளர் முத்து ஆகியோரை தமிழ்நாடு அரசு நியமித்துள்ளது.

இது குறித்து, ஓய்வுபெற்ற நீதிபதி கலையரசன் கூறுகையில், "சூரப்பா மீதான ஊழல் குற்றச்சாட்டுகள் குறித்த புகார்களை மின்னஞ்சல் மூலம் அனுப்பலாம். inquirycomn.vc.annauniv@gmail.com என்ற முகவரியிலும், அஞ்சல் மூலமாக அனுப்புபவர்கள் Enquiry Authority Against Vc Anna University, Podhigai Valagam, Kumarasamy Raja salai, Greenaway road, Chennai-28 என்ற முகவரிக்கு அனுப்பலாம். நேரில் வந்தும் புகார்களைத் தெரிவிக்கலாம்.

விசாரணை மேற்கொள்வது குறித்து அலுவலர்களுடன் ஆலோசனை மேற்கொள்ளப்பட்டுள்ளது. அதனடிப்படையில் கோப்புகள் ஆய்வுசெய்யப்பட்டு விசாரணை மேற்கொள்ளப்படும்" எனத் தெரிவித்தார்.

இதையும் படிங்க:விளைவுகள் கடுமையாக இருக்கும் - காவல்துறையை எச்சரிக்கும் திமுக!