சுத்தம்தான் சுகாதாரம்; சுத்தமாக இருந்தாலே கொரோனா நம்ம பக்கத்துல வராது - யோகிபாபு

யோகிபாபு, ராம்கியை வைத்து கொரனோ தாக்கத்திலிருந்து தப்பித்துக்கொள்ளும் விழிப்புணர்வுக்காகக் காணொலி ஒன்றை தமிழ்நாடு மக்கள் நல்வாழ்வு மற்றும் குடும்ப நலத் துறை வெளியிட்டுள்ளது.

சீனாவின் வூஹான் நகரில் தோன்றியதாகக் கூறப்படும் கோவிட்-19 (கொரோனா) என்ற வைரஸ் தொற்று, தற்போது உலகம் முழுவதும் பரவிவருகிறது. கடந்தாண்டு டிசம்பர் இறுதியில் பரவத் தொடங்கிய, இந்தத் தொற்று காரணமாக உலகளவில் இதுவரை மூன்றாயிரத்து 800-க்கும் மேற்பட்டோர் உயிரிழந்துள்ளனர்.

உலகளவில் அச்சுறுத்திவரும் கொரோனா வைரசின் தாக்கம் சீனா, தென் கொரியாவில் குறைந்துவரும் நிலையில், தற்போது ஐரோப்பிய நாடுகளில் அதன் தாக்கம் அதிகமாகக் காணப்படுகிறது. இதிலிருந்து தப்பிக்க முன்னெச்சரிக்கை நடவடிக்கைகளை வலியுறுத்தி அரசும் பிரபலங்களும் விழிப்புணர்வுகளை மக்களிடையே ஏற்படுத்திவருகின்றனர்.

தற்போது தமிழ்நாடு அரசின் மக்கள் நல்வாழ்வு மற்றும் குடும்ப நலத் துறை ஒரு விழிப்புணர்வு காணொலியை வெளியிட்டுள்ளது. அதில் நடிகர் ராம்கி, யோகி பாபு உள்ளிட்டோர் நடித்துள்ளனர். அதில், கொரனோவின் அறிகுறி, கொரனோவிலிருந்து நம்மை தற்காத்துக் கொள்வது எப்படி, முன்னெச்சரிக்கை நடவடிக்கைகள் உள்ளிட்டவைகள் குறித்து கூறப்பட்டுள்ளது.

எட்டு நிமிடங்களுக்கு ஒடும் இந்தக் காணொலியானது தற்போது சமூக வலைதளத்தில் அதிகமாகப் பகிரப்பட்டுவருகிறது.