கடந்த காலங்களில், அரசு மருத்துவமனைகளில் பணியாற்றும் மருத்துவ மேற்படிப்பு மாணவர்கள் மற்றும் பயிற்சி மருத்துவர்கள், 24 மணி நேரமும் பணியமர்த்தப்பட்டு வந்தனர். இவ்வழக்கத்தை மாற்றி, மருத்துவ மேற்படிப்பு மாணவர்கள், பயிற்சி மருத்துவர்களுக்கு, 8 மணி நேரமாகப் பணி நேரத்தை நிர்ணயித்து தமிழ்நாடு அரசு கடந்த 2015ஆம் ஆண்டு உத்தரவு பிறப்பித்தது. ஆனால், இந்த உத்தரவு முறையாக அமல்படுத்தப்படவில்லை எனக்கூறி, சென்னையைச் சேர்ந்த மருத்துவர் ரவீந்திரநாத், உயர்நீதிமன்றத்தில் வழக்குத் தொடர்ந்துள்ளார்.
அந்த மனுவில், பணிச்சுமை காரணமாக மதுரை மருத்துவக் கல்லூரியில், மருத்துவ மேற்படிப்பு மாணவர் உதயராஜ் தற்கொலை செய்து கொண்டதாகக் குறிப்பிட்டுள்ளார்.
பணி நேரம் நிர்ணயம் செய்த உத்தரவை அமல்படுத்தாததால் மருத்துவ மேற்படிப்பு மாணவர்கள், பயிற்சி மருத்துவர்களின் உடல் நலன் பாதிப்பதுடன், அவர்கள் வழங்கும் சிகிச்சையின் தரமும் பாதிக்கப்படுவதாகவும் குறிப்பிட்டுள்ளார்.