சென்னை: வில்லிவாக்கத்தைச் சேர்ந்த நந்தினி (27) என்பவர் தனது தம்பி மதன் தற்கொலை குறித்து துக்கம் விசாரிக்க அம்பத்தூர் தொழிற்பேட்டை காவல் நிலையம் எல்லைக்குட்பட்ட ஐசிஎப் காலணிக்கு வந்துள்ளார். அப்போது நந்தினி வீட்டின் அருகில் சென்ற முகமூடி அணிந்த மர்ம நபர்கள் நந்தினியை சரமாரியாக வெட்டியதில் சம்பவ இடத்திலேயே உயிரிழந்தார்.
இதுகுறித்து அம்பத்தூர் தொழிற்பேட்டை காவல்துறையினருக்குத் தகவல் தெரிவிக்கப்பட்டு, சம்பவ இடத்திற்கு வந்த அம்பத்தூர் தொழிற்பேட்டை போலீசார் சடலத்தை மீட்டு உடற்கூறு ஆய்விற்காக ஸ்டான்லி அரசு மருத்துவமனைக்கு அனுப்பி வைத்தனர். இந்நிலையில், போலீசார் இந்த கொலை குறித்து வழக்குப் பதிவு செய்து மேற்கொண்ட விசாரணையில், ஏற்கனவே அதே பகுதியில் போண்டா பாலாஜி என்பவர் வெட்டிக் கொலை செய்யப்பட்ட வழக்கில் கைது செய்யப்பட்ட சதீஷ் என்பவரின் மனைவி நந்தினி என்பது முதற்கட்ட விசாரணையில் தெரியவந்துள்ளது.