தென்சென்னை மக்களவைத் தொகுதியில் சைதாப்பேட்டை, விருகம்பாக்கம், தியாகராய நகர், வேளச்சேரி, மயிலாப்பூர் மற்றும் சோழிங்கநல்லூர் ஆகிய ஆறு சட்டப்பேரவைத் தொகுதிகள் உள்ளன. இந்தத் தொகுதியில் பதிவாகும் வாக்குகள் சென்னை அண்ணா பல்கலைக்கழகத்தில் உள்ள கிண்டி பொறியியல் கல்லூரியில் எண்ணப்பட உள்ளன.
இதற்கு உரிய பாதுகாப்பு ஏற்பாடுகளை காவல்துறை கூடுதல் ஆணையர் மகேஷ்குமார் அகர்வால், இணை ஆணையர் மகேஸ்வரி ஆகியோர் நேரில் ஆய்வு செய்து பாதுகாப்பு ஏற்பாடுகள் குறித்து கேட்டறிந்தனர்.
அதேபோல் தென்சென்னை தொகுதிக்கான தேர்தல் நடத்தும் அலுவலர் ஆல்பின் ஜோவும் நேரில் ஆய்வு செய்தார். மேலும் ஒவ்வொரு அறையாக சென்று பார்வையிட்டு பாதுகாப்பு ஏற்பாடுகள் குறித்தும் காவல்துறை அதிகாரிகளுக்கு விளக்கினார்.
தென்சென்னை மக்களவைத் தொகுதியில் உள்ள ஆறு சட்டப்பேரவை தொகுதிகளுக்கான வாக்குப்பதிவு இயந்திரங்கள் வைப்பதற்கு 13 பாதுகாப்பு அறைகள் ஏற்படுத்தப்பட்டுள்ளன. அதேபோல் ஆறு தொகுதிகளுக்கும் தனித்தனியாக வாக்குகள் எண்பதற்கான மையங்களும் தயார் நிலையில் உள்ளன. மேலும் இந்த மையத்திற்கு வேட்பாளர்கள் பூத் ஏஜெண்டுகள் உள்ளிட்டவர்கள் வருவதற்கு தனித்தனியாக நுழைவு வாயில்கள் அமைக்கப்பட்டுள்ளன.
வாக்குப்பதிவு இயந்திரங்கள் வைக்கப்பட்டுள்ள அறைகளில் 42 சிசிடிவி கேமராக்கள் பொருத்தப்பட்டுள்ளன. மேலும் அதனை கண்காணிக்க கட்டுப்பாட்டு அறையும் தனியாக அமைக்கப்பட்டுள்ளது.