'பறையர் கலகத்தை' சுதந்திரப் போராட்டமாக அங்கீகரிக்க வேண்டும்... முதலமைச்சருக்கு விசிக எம்.பி. கடிதம்

பிரிட்டிஷ் ஆட்சியை எதிர்த்த 'பறையர் கலகம்' என்ற அமைப்பை சுதந்திரப் போராட்டமாக அங்கீகரிக்கக்கோரி முதலமைச்சர் மு.க. ஸ்டாலினுக்கு விடுதலைச்சிறுத்தைகள் கட்சியின் எம்.பி. ரவிக்குமார் கடிதம் எழுதியுள்ளார்.

சென்னை: விடுதலைச் சிறுத்தைகள் கட்சி எம்.பி. ரவிக்குமார் முதலமைச்சருக்கு எழுதியிருக்கும் கடிதத்தில், 'பிரிட்டிஷ் காலனிய ஆதிக்கத்திலிருந்து விடுதலைபெற்ற இந்திய சுதந்திரத்தின் 75ஆவது ஆண்டு அமுதப் பெருவிழாவை நாம் சிறப்புடன் கொண்டாடிக் கொண்டிருக்கிறோம்.

சுதந்திரப் போராட்டத்தில் ஈடுபட்டவர்களை நன்றியோடு இந்த நேரத்தில் நினைவுகூர்ந்து அவர்களது போராட்டங்களை போற்றி வருகிறோம். இந்திய சுதந்திரத்திற்கு அனைத்து தரப்பு மக்களுமே பங்களிப்பு செய்துள்ளனர். ஆனால், வரலாறு எழுதுதலில் கடைப்பிடிக்கப்படும் அணுகுமுறை காரணமாக சில வரலாற்று ஆளுமைகள் மட்டுமே சுதந்திரப் போராட்ட தியாகிகளாக பெருமைப்படுத்தப்படும் நிலை உள்ளது.

விளிம்பு நிலை வரலாற்றறிஞர்கள் சுதந்திரப்போராட்டத்தில் பங்களிப்பு செய்த அடித்தள மக்களைப் பற்றி கவனப்படுத்தியுள்ளனர். 1919ஆம் ஆண்டு காங்கிரஸ் தலைவராக மகாத்மா காந்தியடிகள் பொறுப்பேற்ற பின்னர் அவரால் முன்வைக்கப்பட்ட ஒத்துழையாமை, புறக்கணிப்பு, சட்ட மறுப்பு மற்றும் சிறை நிரப்புவதற்கான நேரடி நடவடிக்கைகள் முதலான போராட்ட வடிவங்கள், அதற்கு முன்பு மக்களால் பயன்படுத்தப்பட்டவைதான் என்பதை வரலாற்று அறிஞர்கள் சுட்டிக்காட்டியுள்ளனர். இந்தப் போராட்ட வடிவங்கள் அன்றைய சென்னை மாகாணத்தில் பறையர் சமூகத்தவரால் பிரிட்டிஷ் ஆட்சிக்கு எதிராக பயன்படுத்தப்பட்டிருப்பதை பிரிட்டிஷ் அரசின் ஆவணங்கள் வெளிப்படுத்துகின்றன.

சென்னை பூந்தமல்லி பகுதியில் பிரிட்டிஷ் அலுவலர் ரிச்சர்ட் டைட்டன் என்பவர், அதிகமாக வரிவசூலிக்க முயன்ற போது அதற்குக் கடுமையான எதிர்ப்பு எழுந்துள்ளது. வரி செலுத்தாத மிராசுதார்களின் மிராசி உரிமையை ரத்து செய்ததோடு, தானியப் பகிர்வில் பறையர்களுக்கு இருந்த பாரம்பரிய உரிமையையும் ரிச்சர்ட் டைட்டன் ரத்து செய்துள்ளார். அறுவடையின்போது தங்களுக்குப் பாரம்பரியமாக வழங்கப்படும் தானிய உரிமை பாதுகாக்கப்படவேண்டும் என வலியுறுத்தி பூந்தமல்லி பகுதியிலிருந்த பல கிராமங்களைச் சேர்ந்த பறையர்கள் விவசாயப் பணிகளை புறக்கணித்து பிரிட்டிஷ் அலுவலர்களை முற்றுகையிட்டுப் போராட்டம் நடத்தியுள்ளனர். இந்தப் போராட்டம் ஒரு கலகமாக உருவெடுத்துள்ளது.

பிரிட்டிஷ் ஆவணங்களில் பறையர் கலகம்என்று அது பதிவு செய்யப்பட்டிருக்கிறது. பிரிட்டிஷ் ஆவணங்களை மேற்கோள்காட்டி யூஜின் எஃப் இர்ஷிக் என்ற வரலாற்றறிஞர் தென்னிந்தியாவைக் கட்டமைக்கும் உரையாடல் மற்றும் வரலாறு 1795-1895 ஆக்ஸ்போர்டு யுனிவர்சிட்டி பிரஸ் மெட்ராஸ் என்ற தனது நூலில் விரிவாக அதைப் பதிவு செய்திருக்கிறார் பக்கம் (44-48) என கடிதத்தில் குறிப்பிட்டுள்ளார்.

1785ஆம் ஆண்டு நவம்பர் மாதத்தில் பூந்தமல்லி பகுதியில் வாழ்ந்த பறையர்கள் பிரிட்டிஷ் சிப்பாய்கள் சிலரைப் பிடித்துக் கட்டி வைத்து அடித்து உதைத்துள்ளனர். அப்போது பொறுப்பிலிருந்த ரிச்சர்டு டைட்டன், தனது உயிருக்கு ஆபத்து வந்துவிட்டதெனவும், சேத்துப்பட்டிலிருந்த தனது அலுவலகம் தாக்கப்படும் எனவும் அஞ்சி ஒரு 'கம்பெனி' சிப்பாய்களை அனுப்பும்படி கவர்னரிடம் வேண்டுகோள் விடுத்திருக்கிறார்.

இர்ச்சிக், (பக்கம் 45) அதாவது பூந்தமல்லிப்பகுதியில் இந்தப் பறையர் கலகத்தைத் தலைமையேற்று வழிநடத்திய பேட்டையா, பூந்தமல்லி குட்டி, மாங்காடு கொம்பன், பம்மல் கண்ணையன் ஆகியோரைக் கைது செய்ய கலெக்டராயிருந்த லயோனல் ப்ளேஸ் மேற்கொண்ட முயற்சிகள் வெற்றிபெறவில்லை. சென்னையில் பெத்தநாயக்கன் பேட்டைக்கு வடக்கே இருந்த பெரிய பறைச்சேரியில் 1796இல் பெரியதம்பி என்ற பறையர் தலைவர் இருந்தாரென்பது கலெக்டர் லயோனல் ப்ளேஸின் அறிக்கைகளால் தெரியவருகிறது.

செங்கல்பட்டு மாவட்டத்தில் இருந்த கருங்குழி என்ற ஊரைச்சேர்ந்த பறையர் சமூகத்தவருக்கு பெரியதம்பி கடிதம் ஒன்றை எழுதி, அவர்கள் எல்லோரையும் சென்னையை நோக்கிப் புறப்பட்டு வரச்சொல்லித் தூண்டியதாகப் பிரிட்டிஷ் ஆவணங்கள் குறிப்பிடுகின்றன.

பிரிட்டிஷ் ஆவணங்களாலும் வரலாற்றறிஞர்களாலும் உறுதிப்படுத்தப்படும் 'பறையர் கலகம்' என்ற போராட்டம் சென்னை, செங்கல்பட்டு மாவட்டங்களில் 1785 முதல் 1796 வரை 10 ஆண்டுகளுக்கும் மேல் நீடித்துள்ளது. அந்தப் போராட்டத்தை காலனிய எதிர்ப்புப் போராட்டமாக அங்கீகரிக்க வேண்டுமெனவும், இந்திய சுதந்திரத்தின் பவளவிழா கொண்டாடப்படும் இவ்வேளையில் உரிய வகையில் அதைப் பெருமைப்படுத்த நடவடிக்கை எடுக்க வேண்டுமெனவும் பணிவுடன் கேட்டுக்கொள்வதாக’ ரவிக்குமார் தனது கடிதத்தில் விளக்கியுள்ளார்.

இதையும் படிங்க:அதிமுக அலுவலகம் சூறையாடப்பட்டது தொடர்பான வழக்குகள் சிபிசிஐடிக்கு மாற்றம்