நெசப்பாக்கம் சாலையில் திடீர் பள்ளம்: வாகனம் கவிழ்ந்து விபத்து

நெசப்பாக்கத்தில் கழிவு நீர் சுத்திகரிப்பு நிலையம் முன் அமைக்கப்பட்டுள்ள சாலையில் ஏற்பட்ட திடீர் பள்ளத்தில் வாகனம் கவிழ்ந்து விபத்துக்குள்ளானது.

சென்னை: கே.கே.நகரிலிருந்து நெசப்பாக்கம் செல்லும் அண்ணா மெயின் சாலையில் நெசப்பாக்கம் கழிவுநீர் சுத்திகரிப்பு நிலையத்தின் முன் திடீர் பள்ளம் ஏற்பட்டது. இதில் அங்கு நின்றுகொண்டிருந்த வாகனம் கவிழ்ந்து விபத்துக்குள்ளானது.

கடந்த ஆண்டு முதல் இந்த சாலையில் ஆறுமுறை பள்ளம் ஏற்பட்டிருப்பதாக அப்பகுதி வாசிகள் தெரிவித்துள்ளனர். இதுகுறித்து சென்னை மாநகராட்சி மத்திய வட்டார கண்காணிப்புப்பொறியாளர் கூறுகையில், " சைதாப்பேட்டை, அசோக் நகர், ஈக்காட்டுத்தாஙகல் வழியாக நெசப்பாக்கம் கழிவுநீர் சுத்திகரிப்பு நிலையத்திற்கு கழிவுநீர் கொண்டு வந்து சேர்க்கும் ராட்சத குழாய்கள் இந்த சாலையில் பதிக்கப்பட்டுள்ளன.

அவற்றை அமைத்து 20 வருடங்கள் ஆகிவிட்டதால், தொடர்ந்து அவற்றில் ஏற்படும் பாதிப்புகளால் இதுபோன்ற பள்ளங்கள் ஏற்படுகின்றன. இந்தக் குழாய்களை மறு சீரமைப்பு செய்வதற்கான விவரங்கள் முதலமைச்சருக்கு அனுப்பப்பட்டுள்ளன. விரைவில் இந்தப் பிரச்னைக்கு நிரந்தரத் தீர்வு கிடைக்கும்" என தெரிவித்தார்.

இந்த பள்ளம் குறித்து பொதுமக்கள் கூறுகையில், "தற்போது அமைக்கப்பட்டிருக்கும் குழாய்கள் சுமார் 10 வருடங்களே கழிவுநீரினால் உருவாகும் அமில வாயுக்களைத் தாங்கும். அவற்றை சென்னை மாநகராட்சி 20 வருடங்களாக பராமரிப்பின்றி வைத்துள்ளது.

வாகனங்கள் செல்ல தடை செய்யபட்டிருக்கும் இந்த வழியை சென்னை மாநகராட்சி ஆக்கிரமித்து, தூய்மை பணியாளர்கள் பயன்படுத்தும் எலக்ட்ரிக் ஆட்டோக்களை நிறுத்த மேற்கூரை அமைக்கப்பட்டுள்ளது.

அதனருகே ஜே.சி.பி, மணல் லாரி, குப்பை அள்ளும் லாரிகள் நிறுத்தப்பட்டுள்ளன. அப்படி நிறுத்தப்பட்டிருந்த டெம்போ வேன் தான் தற்போது ஏற்பட்டுள்ள பள்ளத்தில் விழுந்திருக்கிறது.

சாலையின் ஒரு பக்கம் மட்டுமே பள்ளம் ஏற்பட்டதால் எவ்வித உயிரிழப்புகளும் ஏற்படவில்லை. ஒருவேளை இன்னொரு பக்கமும் பள்ளம் நீண்டிருந்தால் வாகன ஓட்டிகளுக்கு பெரும் பாதிப்பாக அமைந்திருக்கும்" என்றனர்.