மழைநீர் வடிகால் பணிகளை மேற்கொள்ளாத ஒப்பந்ததாரர்கள் மீது கடும் நடவடிக்கை - ககன் தீப் சிங் பேடி

சென்னையில் மழைநீர் வடிகால் கட்டுமான பணிகளை முறையாக மேற்கொள்ளாத ஒப்பந்ததாரர்கள் மீது எவ்வித சமரசமும் இல்லாமல் கடும் நடவடிக்கை எடுக்கப்படும் என்று மாநகராட்சி ஆணையர் ககன் தீப் சிங் பேடி தெரிவித்துள்ளார்.

சென்னையில் நடைபெற்று வரும் மழைநீர் வடிகால் பணிகள் தொடர்பாக மாநகராட்சி ஆணையர் ககன்தீப் சிங் பேடி, ரிப்பன் மாளிகையில் செய்தியாளர்களைச் சந்தித்தார். அப்போது பேசிய அவர், "கடந்த ஓராண்டில் மட்டும் 964 கிலோ மீட்டர் நீளத்திற்கு மழைநீர் வடிகால் பணிகள் அமைக்கப்பட்டுள்ளன. சென்னையின் மையப்பகுதிகளில் மட்டும் பார்த்தால், 224 கிலோ மீட்டர் நீளத்திற்கு மழைநீர் வடிகால் பணிகள் நடைபெற்றுள்ளன.

இதற்கு 728 கோடி ரூபாய் நிதி தமிழ்நாடு அரசால் வழங்கப்பட்டுள்ளது. இவை சிங்காரச் சென்னை திட்டத்தின்கீழ் மேற்கொள்ளப்பட்டுள்ளது. குறிப்பாக சீத்தம்மாள் காலணி, தியாகராய நகரில் ஜி.என்.ரோடு, பசுல்லா சாலை, அசோக் நகர், மேற்கு மாம்பலத்தில் ரங்கராஜபுரம், விருகம்பாக்கம், வடசென்னையில் அம்பேத் கல்லூரி சாலை, புளியந்தோப்பு மற்றும் கொளத்தூர் ஆகிய பகுதிகளில் பெரும்பாலான பணிகள் முடிவடைந்துள்ளன.

இதனை தலைமைச் செயலாளர் உடன் நேரில் ஆய்வு செய்துள்ளோம். இவை தவிர, நீண்டகால பணிகளாக கொசஸ்தலை ஆறு, கோவளம் பகுதியை இணைக்கும் வகையில் மடிப்பாக்கம், ஆலந்தூர் போன்ற இடங்களில் பணிகள் நடைபெற்று வருகின்றன. இவையெல்லாம் வெறும் ஆறு மாதங்களில் முடிவுறும் பணிகள் இல்லை.

அதேநேரம் சிங்காரச் சென்னை திட்டத்தின்கீழ் நடைபெறும் பணிகளை தீவிரப்படுத்தி முடித்துள்ளோம். நெடுஞ்சாலைத்துறை சார்பில் வால்டாக்ஸ் சாலை, அசோக் நகர் முதல் அடையாறு வரையிலான சாலை ஓரங்களில் மழைநீர் வடிகால் பணிகள் நடைபெற்று வருகின்றன.

அவர்களும் உரிய கால கட்டத்திற்குள் பணிகளை முடிக்க திட்டமிட்டு வேலை செய்து வருகிறார்கள். நீர்வளத்துறை சார்பில் நடக்கும் பக்கிங்ஹாம் ஓடை, ஓட்டேரி நல்லா ஓடை, விருகம்பாக்கம் ஓடை ஆகியவற்றை தூர்வாரி பராமரிக்கும் பணியை செய்து வருகிறார்கள்.

மழைநீர் வடிகால் வழியே இந்த ஓடைகளுக்குதான் தண்ணீர் செல்லும். எனவே மழைக் காலங்களில் அது தொடரும். ஆகவே கடந்த ஆண்டைப்போல பெருமளவில் தண்ணீர் தேங்காது. ஒரு சில இடங்களில் மழைநீர் தேங்கினாலும் அவை விரைவாக வடிந்து விடும். தேவையான இடங்களில் நீர் உறிஞ்சும் எந்திரங்களை தயாராக வைத்துள்ளோம்.

கடந்த ஜூன் மாதத்தில் இருந்து மழைநீர் வடிகால் பணிகளை மேற்கொள்ளும் ஒப்பந்ததாரர்களுக்கு, கட்டுமானம் நடைபெறும் இடங்களில் பேரிகார்டுகள் வைப்பதை உறுதி செய்ய முறையாக அறிவுறுத்தி உள்ளோம். அதனை பின்பற்றுகிறார்களா என்பதை கண்காணித்தும் வந்துள்ளோம்.

இருப்பினும் நெடுஞ்சாலைத்துறை சார்பில் மழைநீர் வடிகால் கட்டுமான பணி நடைபெறும் இடத்தில் விபத்து நடந்து உயிரிழப்பு ஏற்பட்டுள்ளது. அதேநேரம் சென்னைக்கும் இப்படியொரு சம்பவம் நடந்துள்ளது என்பது வருத்தம் அளிக்கும் நிகழ்வு. பணிகள் நடைபெறும் இடங்களில் தடுப்புகள் அமைக்கும் பணியில் அலுவலர்கள், ஒப்பந்ததாரர்கள் கவனமாக இருப்பதுபோல, மக்களும் விழிப்புணர்வுடன் இருக்க வேண்டும்.

எந்த இடத்திலும் தடுப்புகளை விலக்கிக் கொண்டு செல்லக்கூடாது. அப்படி நடக்கும்போது உரிய முறையில் மாநகராட்சியிடம் புகார் அளிக்கலாம். ஒவ்வொரு முறையும் ஆலோசனை கூட்டத்தின்போது பேரிகார்டுகளை முறையாக அமைக்க வேண்டும் என்பதை எங்களுக்கு முதலமைச்சர் ஸ்டாலின் அறிவுறுத்தி வருகிறார். மழைநீர் வடிகால் கட்டுமான பணிகளை முறையாக மேற்கொள்ளாத ஒப்பந்ததாரர்கள் மீது எவ்வித சமரசமும் இல்லாமல் கடும் நடவடிக்கை எடுக்கப்படும்" எனத் தெரிவித்தார்.

இதையும் படிங்க:உயிரிழந்த செய்தியாளருக்கு ரூ.50 லட்சம் நிவாரணம் வழங்க வேண்டும் - டிடிவி தினகரன் வலியுறுத்தல்