கூகுள் மேப்பை ஓரம்கட்டும் ஊபர் - பொது போக்குவரத்து வசதி அறிமுகம்!

சென்னை: ஊபர் செயலியில் பொது போக்குவரத்து நேரங்கள், பயணக் கட்டண விவரங்கள், வழிகள், அருகாமையில் உள்ள பேருந்து ரயில் நிறுத்தங்கள் உள்ளிட்ட தகவல்களைப் பார்க்கும் வசதியை அந்நிறுவனம் சென்னையில் அறிமுகப்படுத்தியுள்ளது.

அமெரிக்காவின் மிகப் பெரிய டாக்ஸி போக்குவரத்து சேவை நிறுவனமான ஊபர், இந்தியாவிலும் சேவை வழங்கி வருகிறது. சிறிய, பெரிய வகை கார்கள், ஒரு நாள் வாடகை கார்கள், ஆட்டோ, பைக், பொருள்களை ஓரிடத்திலிருந்து மற்றொரு இடத்துக்கு கொண்டு செல்வது உள்ளிட்ட சேவைகளை இணைய செயலி மூலமாக வழங்கி வருகிறது. போக்குவரத்து சேவையில் கடும் போட்டி நிலவி வருவதால், புதிய முயற்சிகளை ஊபர் கையாண்டு வருகிறது. அந்த வகையில், தற்போது பொது போக்குவரத்து சேவை ஊபர் செயலியில் இணைக்கப்பட்டுள்ளது.

இதுதொடர்பாக ஊபர் வெளியிட்டுள்ள அறிக்கையில், "பொது போக்குவரத்து நேரங்கள், பயணக் கட்டண விவரங்கள், வழிகள், அருகாமையில் உள்ள பேருந்து ரயில் நிறுத்தங்கள் உள்ளிட்ட தகவல்களைப் புதிய பொது போக்குவரத்து சேவையில் பார்த்திட முடியும். இதுமட்டுமின்றி குறைந்த நேரத்தில் திட்டமிட்டுள்ள இடத்தினை அடைய, எந்த வழியைத் தேர்வு செய்யலாம் என்ற விவரமும் அதில் இடம்பெறுகிறது. மேலும், பேருந்து, ரயில்களின் வருகை, புறப்படும் நேரங்கள், இறங்கும் இடத்திலிருந்து செல்ல வேண்டிய இடத்துக்கு நடந்து செல்வதற்கான வழி உள்ளிட்ட வசதிகளும் அடங்குகிறது. இந்த செயலி உதவியுடன் பயணிகள் தொடங்கும் இடத்திலிருந்து முடியும் இடம் வரை முழுமையான வழிகாட்டுதல்களைப் பெறலாம் எனக் குறிப்பிட்டுள்ளனர்.

ஊபரில் பொது போக்குவரத்து சேவை அறிமுகம்

2040 ஆம் ஆண்டுக்குள் புகை கக்காத, காற்று மாசு ஏற்படாத வாகனங்கள் மூலமாகவும், பொது போக்குவரத்து பயன்பாட்டை ஊக்குவிப்பதன் மூலமாகவும் சூழல் பாதிப்பைக் குறைக்கும் நிறுவனத்தின் இலக்கை அடையும் நோக்கில் இந்த புதிய வசதி அறிமுகம் செய்யப்பட்டுள்ளதாக அந்நிறுவனம் தரப்பில் தெரிவித்துள்ளது. ஏற்கெனவே ஹைதராபாத், டெல்லியில் இத்தகைய சேவை ஊபர் செயலியில் இணைக்கப்பட்டுள்ள நிலையில், தற்போது சென்னையிலும் இவ்வசதி அறிமுகப்படுத்தப்பட்டுள்ளது.

இதுகுறித்து பேசிய ஊபர் ஆசியப் பிரிவுத் தலைவர் பிரப்ஜீத் சிங், "சென்னையில் பொது போக்குவரத்து வசதி அறிமுகப்படுத்தப்பட்டதன் மூலம் பயணிகள் பணம் மற்றும் நேரத்தைச் சேமிக்க முடியும். மேலும் நகரங்களில் சமச்சீரான மற்றும் நிலைக்கத்தக்க வளர்ச்சியை நாங்கள் அடைய முடியும்" என்றார்.

இதையும் படிங்க:வாகன ஏற்றுமதியில் 13% உயர்வு: வெளிநாட்டுச் சந்தையில் தூள்கிளப்பும் பஜாஜ் ஆட்டோ!