சென்னை: தமிழ்நாடு அரசுப் பணியாளர் தேர்வாணையம் மூலம் தமிழ்நாடு அரசு சார்ந்த பணிகள் துறை வாரியாக நிரப்பப்பட்டு வருகிறது. இந்த நிலையில் கடந்த 2022ஆம் ஆண்டு மார்ச் மாதம் 7,301 காலிப்பணியிடங்களுக்கு குரூப் 4 தேர்வு அறிவிக்கப்பட்டது. இதன் அடிப்படையில் 2022 ஜூலை 24ஆம் தேதி குரூப் 4 தேர்வு நடைபெற்று முடிந்தது. இந்த தேர்வை மொத்தம் 18 லட்சத்து 36 ஆயிரத்து 535 பேர் எழுதினர். இதனைத் தொடர்ந்து கடந்த அக்டோபர் மாதமே தேர்வு முடிவுகள் வெளியிடப்படும் என்று எதிர்பார்க்கப்பட்டது.
ஆனால், கிட்டத்தட்ட 7 மாதங்கள் ஆகியும் குரூப் 4 தேர்வு முடிவுகள் வெளியிடப்படவில்லை. இதனால் ஏற்படும் தாமதத்தால் குரூப் 4 தேர்வை எழுதிய சுமார் 18 லட்சம் தேர்வர்கள் காத்துக் கொண்டு இருக்கும் நிலை உருவாகி உள்ளது. அதேநேரம் இந்த மாதத்தில் (மார்ச் 2023) குரூப் 4 தேர்வு முடிவுகள் வெளியிடப்படும் எனவும், தேர்வு 2 தாள்களை கொண்டதால் 36 லட்சம் விடைத்தாள்களை திருத்தும் பணிகள் நடைபெற்று வருவதாகவும் தகவல் வெளியானது.
இதன் காரணமாக மார்ச் மாதம் தேர்வு முடிவுகளை சரியாக வெளியிடுவோம் என்று தமிழ்நாடு அரசுப் பணியாளர் தேர்வாணையம் அறிவித்திருந்தது. இருப்பினும், தேர்வு முடிவுகள் குறித்து இன்னும் தகவல்கள் ஏதும் வெளியாகவில்லை. ஆகவே காத்துக் கொண்டிருக்கும் தேர்வர்கள், சமூக வலைதளங்களில் ஒன்றான ட்விட்டரில் குரூப் 4 தேர்வு முடிவுகளை உடனே வெளியிடும்படி பதிவிட்டு வருகின்றனர்.