'எடப்பாடி பழனிசாமியைக் கடவுளும் மன்னிக்கமாட்டார்' - டிடிவி தினகரன்

சென்னை: கரோனா தடுப்பு நடவடிக்கையில் தங்களுடைய கையாலாகாதனத்தை மறைக்க கடவுள் மீது பழியைப் போட்டுவிட்டு ஆட்சியாளர்கள் தப்பிக்க நினைப்பதைக் அந்தக் கடவுளும் மன்னிக்க மாட்டார் என அமமுக பொதுச் செயலாளர் டிடிவி தினகரன் கூறியுள்ளார்.

இதுதொடர்பாக அவர் வெளியிட்ட அறிக்கையில், "சென்னை, திருவள்ளூர், காஞ்சிபுரம், செங்கல்பட்டு ஆகிய மாவட்டங்களில் கடுமையான பாதிப்பை ஏற்படுத்திவந்த கரோனா, தற்போது திருவண்ணாமலை, வேலூர், கடலூர், விழுப்புரம், மதுரை, திருநெல்வேலி, தூத்துக்குடி, அரியலூர், கோவை உள்ளிட்ட பெரும்பாலான மாவட்டங்களிலும் அதன் தாக்கம் அதிமாகிக்கொண்டிருக்கிறது. ஆனால், சென்னையைத் தவிர வெளிமாவட்டங்களில் கரோனா தொற்று குறைவு என்று கூறியிருக்கும் முதலமைச்சர் பழனிசாமி எந்த உலகத்தில் சஞ்சரிக்கிறார் என்று தெரியவில்லை.

கரோனாவால் பாதிக்கப்படுவோரின் எண்ணிக்கை தொடர்ந்து அதிகரித்துவருவது பற்றிய கவலை ஆளுவோருக்கு இல்லை என்பதற்கு முதலமைச்சரின் அலட்சியமான பேட்டியே உதாரணம். ஆயிரக்கணக்கான கோடி ரூபாய்க்கு டெண்டர்களை விடுவதில் அரசு காட்டும் ஆர்வத்திலும் அக்கறையிலும் கொஞ்சமாவது கரோனா தடுப்பு நடவடிக்கைகளில் காட்டியிருந்தால் நிலைமை இந்தளவுக்கு மோசமாகியிருக்காது. தங்களின் திறமையின்மையால் நாளுக்கு நாள் சூழல் மோசமாகிவருவதை மறைப்பதற்குத்தான் முதலமைச்சர் தற்போது கடவுளின் மீது பழியைப் போட்டு தப்பிக்க நினைக்கிறார்.

'ஒரே ஒருவர் கூட தமிழ்நாட்டில் கரோனாவால் பாதிக்கப்பட மாட்டார்கள்' என்று சட்டப்பேரவையில் ஆவேசமாக வசனம் பேசியபோது முதலமைச்சருக்கு கடவுள் நினைவுக்கு வரவில்லையா? 'மூன்றே நாள்களில் கரோனா முற்றிலுமாக ஒழிக்கப்படும்' என்று இரண்டு மாதங்களுக்கு முன்பு அடித்துச் சொன்னபோது , தான் ஒரு டாக்டர் இல்லை என்பது முதலமைச்சர் பழனிசாமிக்குத் தெரியாதா? சொல்வதையும் கேட்க மாட்டேன்; அனைத்தையும் நான் அறிவேன்' என எல்லோரையும் எடுத்தெறிந்து பேசிய போதெல்லாம், தான் ஒரு ' உலக மகா மருத்துவ நிபுணர் ' என்று முதலமைச்சர் நினைத்துக் கொண்டிருந்தாரா?

இவ்வளவு நாள்களாக எதிர்க்கட்சியினர், பத்திரிகையாளர்கள் உள்ளிட்டோர் கூறிய கருத்துகளை எல்லாம் புறந்தள்ளிவிட்டு, இப்போது கரோனா பாதிப்பு 60 ஆயிரத்தை நெருங்கி, உயிரிழப்பு எண்ணிக்கை 757ஆக உயர்ந்து, நாள்தோறும் உயிரிழப்போரின் அளவு அதிகரித்துக்கொண்டே வரும் நேரத்தில், மொத்தப் பழியையும் கடவுளின் மீது போட்டுவிட்டு தப்பிக்க நினைத்தால் இந்த ஆட்சியாளர்களை மக்கள் மட்டுமல்ல; கடவுளும் மன்னிக்க மாட்டார்” எனக் கூறியுள்ளார்.