லாரிகள் வேலை நிறுத்த அறிவிப்பு - தடைக்கோரி வழக்கு

எல்.பி.ஜி. டேங்கர் லாரி வேலை நிறுத்தப் போராட்டத்திற்கு தடை விதிக்கக்கோரி, இந்தியன் ஆயில் கார்ப்பரேசன் உள்ளிட்ட மூன்று எண்ணெய் நிறுவனங்கள் சார்பாக சென்னை உயர்நீதிமன்றத்தில் மனு தாக்கல் செய்யப்பட்டுள்ளது.

பொதுத்துறை எண்ணெய் நிறுவனங்கள் ஏப்ரல் மாதம் மாநில அளவிலான புதிய டெண்டர் நடைமுறை வெளியிட்டது. அதில், எல்.பி.ஜி டேங்கர் லாரி உரிமையாளர்கள் 5,500 லாரிகளுக்கு ஒப்பந்தம் கோரப்பட்ட நிலையில், 4,800 லாரிகளுக்கு மட்டுமே ஒப்பந்தம் வழங்கியதாக கூறப்படுகிறது. இந்நிலையில், விடுபட்ட 700 லாரிகளுக்கும், பொதுத்துறை எண்ணெய் நிறுவனங்கள் ஒப்பந்தம் வழங்க வேண்டும் என வலியுறுத்தி, ஜூலை 1ஆம் தேதி முதல் போராட்டத்தில் ஈடுபட போவதாக தென்னிந்திய டேங்கர் லாரி உரிமையாளர்கள் சங்கம் அறிவித்துள்ளது.

இந்த போராட்டம் நடைபெற்றால் 22 கோடியே 93 லட்சம் வாடிக்கையாளர்களுக்கு சமையல் எரிவாயு, பெட்ரோலிய பொருட்கள் கிடைக்காத நிலை உருவாகும் எனக்கூறி, இந்த வேலை நிறுத்த போராட்டத்தை எதிர்த்து இந்தியன் ஆயில் கார்ப்பரேசன், பாரத் பெட்ரோலியம், இந்துஸ்தான் பெட்ரோலியம் ஆகிய நிறுவனங்கள் தனித் தனியாக சென்னை உயர் நீதிமன்றத்தில் வழக்கு தொடர்ந்துள்ளன.

அதில், லாரிகளின் வேலை நிறுத்தப் போராட்டதிற்கு தடை விதிக்கக்கோரியும், எல்.பி.ஜி கேஸ் நிரப்பும் மையங்களுக்கு காவல்துறை பாதுகாப்பு வழங்கக் கோரியும் சென்னை உயர்நீதிமன்றத்தில் மனு தாக்கல் செய்யப்பட்டுள்ளது. இந்த வழக்கு சென்னை உயர் நீதிமன்றத்தில் விரைவில் விசாரணைக்கு வர உள்ளது.