பொங்கல் தின சிறப்புப் பேருந்து: முன்பதிவில் 10.80 கோடி ரூபாய் வருமானம்

சென்னை: 2020ஆம் ஆண்டு பொங்கல் திருநாளை முன்னிட்டு 16 ஆயிரத்திற்கும் மேற்பட்ட சிறப்புப் பேருந்துகள் இயக்கப்பட்டு, முன்பதிவு வாயிலாக 10.80 கோடி ரூபாய் வருவாய் ஈட்டியுள்ளதாகப் போக்குவரத்துக் கழகம் தெரிவித்துள்ளது.

சென்னை, போக்குவரத்துத் துறை வெளியிட்டுள்ள செய்திக்குறிப்பில், தமிழ்நாடு அரசுப் போக்குவரத்துக் கழகங்களில் வாயிலாக, கடந்த மூன்று ஆண்டுகளாக பொங்கல், தீபாவளி பண்டிகைகளின்போது, பொதுமக்கள் தங்கள் சொந்த ஊர்களுக்கு நல்ல முறையிலும், பாதுகாப்பாகவும் பயணம் மேற்கொள்ள ஏதுவாக சிறப்புப் பேருந்துகள் இயக்கப்படுகின்றன. 2019ஆம் ஆண்டு பொங்கல் பண்டிகையின் போது 13 ஆயிரத்து 637 பேருந்துகள் சென்னையிலிருந்து இயக்கப்பட்டு, 7 லட்சத்து 17 ஆயிரத்து 573 பயணிகள் பயணம் செய்தனர்.

அந்த வகையில், இந்த ஆண்டும் பொங்கல் திருநாளை முன்னிட்டு, போக்குவரத்துத் துறை அமைச்சர் எம்.ஆர். விஜயபாஸ்கர் தலைமையில் கடந்த ஜனவரி 7ஆம் தேதி ஆலோசனைக் கூட்டம் நடத்தப்பட்டது. இந்தக் கூட்ட முடிவில் பொங்கல் பண்டிகையை முன்னிட்டு தமிழ்நாடு முழுவதும் ஏறத்தாழ, 30 ஆயிரத்து 120 பேருந்துகள் இயக்க முடிவெடுக்கப்பட்டுள்ளது.

அதன்படி சென்னையிலிருந்து 16 ஆயிரத்து 75 பேருந்துகளும் பிற ஊர்களிலிருந்து 14 ஆயிரத்து 45 பேருந்துகளும் ஜனவரி 10ஆம் தேதி முதல் 14ஆம் தேதி வரை இயக்கப்படும் என்று அறிவிக்கப்பட்டது. அதனைத் தொடர்ந்து பொங்கல் பண்டிகையை முன்னிட்டு இதுவரையில், 2 லட்சத்து 10 ஆயிரத்து 632 பயணிகள் முன்பதிவு செய்துள்ளனர். அதனடிப்படையில், அரசுப் போக்குவரத்துக் கழகத்திற்கு 10 கோடியே 80 லட்சம் ரூபாய் வருவாய் கிடைத்துள்ளது.

14 ஆயிரத்து 492 பேருந்துகள் இயக்கப்பட்டு, 7 லட்சத்து 30 ஆயிரத்து 365 பயணிகள் பயணம் செய்துள்ளனர். இன்று (14.01.2020) நள்ளிரவு வரையில், ஏறத்தாழ 1,600 பேருந்துகள் இயக்கப்பட்டு, மொத்தமாக ஏறத்தாழ 8 இலட்சத்திற்கும் மேற்பட்ட பயணிகள் பயணம் செய்வார்கள் என எதிர்பார்க்கப்படுகிறது.