திருநங்கைகளுக்கான உலக அழகிப் போட்டி: தமிழ்நாட்டைச் சேர்ந்தவர் பங்கேற்பு!

சென்னை: திருநங்கைகளுக்கான உலக அழகிப் போட்டியில் இந்தியா சார்பில் முதல்முறையாக சென்னையைச் சேர்ந்த திருநங்கை நமீதா பங்கேற்றுள்ளார்.

‘மிஸ் கிராண்ட் ஸ்டார் இன்டர்நேஷனல்’ எனப்படும் திருநங்கைகளுக்கான உலக அழகிப் போட்டி ஸ்பெயின் நாட்டின் பார்சிலோனா நகரில் நடைபெற உள்ளது. டிசம்பர் 8 முதல் 14 வரை நடைபெறும் இப்போட்டியில் உலகம் முழுவதிலுமிருந்து 30 திருநங்கைகள் பங்கேற்பார்கள். அதில் இந்தியா சார்பில் கலந்துகொள்ளும் தமிழ்நாட்டைச் சேர்ந்த திருநங்கை நமீதா இன்று ஸ்பெயின் செல்வதற்கு முன் சென்னை விமான நிலையத்தில் செய்தியாளர்களைச் சந்தித்தார்.

அப்போது பேசிய நமீதா, இதுவரை இந்தியாவிலிருந்து எந்த திருநங்கையும் பங்கேற்காத சர்வதேசப் போட்டியில் தான் கலந்துகொள்வது மகிழ்ச்சியளிப்பதாகவும், இனி வருடாவருடம் இந்தியா சார்பில் திருநங்கைகள் பங்கேற்பார்கள் எனவும் நம்பிக்கை தெரிவித்துள்ளார்.

திருநங்கைகளை அனைவரும் தவறாகக் கருதுகின்றனர், ஆனால் அப்படி இல்லை, அனைவரையும் உடன்பிறந்த சகோதரிகளாகப் பார்க்க வேண்டும் என்று வலியுறுத்திய அவர், நண்பர்கள் மூலமாகப் போட்டியின் விபரங்களை அறிந்து விண்ணப்பித்ததாகவும், ஆறு சுற்றுகளில் தேர்ச்சி பெற்று இறுதிச் சுற்றுக்கு முன்னேறியிருப்பதாகவும் பெருமிதம் தெரிவித்தார்.

இதையும் படிங்க: வாழ்க்கையில் சாதிக்க பாலினம் தடையில்லை: இந்தியாவின் முதல் திருநங்கை செவிலி!