மானியக்கோரிக்கை விவாதத்தில் டாப் 2 அமைச்சர்கள் - சபாநாயகர் அப்பாவு வெளியிட்ட தகவல்

தமிழ்நாடு சட்டப்பேரவையில் கடந்த ஏப்ரல் மாதம் 6ஆம் தேதி தொடங்கிய பட்ஜெட் மானியக் கோரிக்கை மீதான விவாத கூட்டத்தொடர் நிறைவு பெற்றது. இதில் அதிக கேள்விகளுக்குப் பதில் அளித்தவர்கள் உயர்கல்வித்துறை அமைச்சர் பொன்முடியும் மற்றும் அமைச்சர் செந்தில் பாலாஜியும் என சபாநாயகர் அப்பாவு தெரிவித்தார்.

சென்னை: 15 கேள்விகளுக்கு பதில் அளித்து டாப் இரண்டு இடங்களில் இருப்பது உயர்கல்வித் துறை அமைச்சர் பொன்முடியும் , மின்சாரம், மதுவிலக்கு மற்றும் ஆயத்தீர்வைத் துறை அமைச்சர் செந்தில் பாலாஜியும் என்றார் சபாநாயகர்.

பின் சுற்றுச்சூழல்-காலநிலை மாற்றத் துறை மற்றும் இளைஞர் நலன், விளையாட்டு மேம்பாட்டுத் துறை அமைச்சர் மெய்யநாதன் 14 வினாக்களுக்கு விடையளித்து இருக்கிறார்.

தொழில்துறை அமைச்சர் தங்கம் தென்னரசு, மீனவர் நலன் மற்றும் கால்நடை பராமரிப்புத்துறை அமைச்சர் அனிதா ராதாகிருஷ்ணன் மற்றும் மக்கள் நல்வாழ்வுத் துறை அமைச்சர் மா. சுப்பிரமணியன் தலா 13 வினாக்களுக்கு விடையளித்து உள்ளனர். அறநிலையத் துறை அமைச்சர் சேகர் பாபு 12 வினாக்களுக்கு விடையளித்து இருக்கிறார், எனக்குறிப்பிட்டார் சபாநாயகர் அப்பாவு.

நிறைவேற்றப்பட்ட முக்கிய சட்டமுன்வடிவுகள்:நீட் தேர்வை ரத்து செய்து +2 மதிப்பெண் அடிப்படையில் மாணவர்களை இளநிலை மருத்துவப் படிப்புகளில் சேரும் வகையில் பிப்ரவரி 8ஆம் தேதி அன்று சட்டமன்ற சிறப்புக் கூட்டத்தில் சட்டமுன்வடிவு ஒருமனதாக நிறைவேற்றப்பட்டது.

கடந்த ஏப்ரல் மாதம் 25ஆம் தேதி அன்று தமிழ்நாட்டில் உள்ள அனைத்து பல்கலைக்கழகங்களிலும் துணை வேந்தர்களை மாநில அரசே நியமிக்க வகை செய்யும் 2022ஆம் ஆண்டு தமிழ்நாடு பல்கலைக்கழகங்கள் சட்டங்கள் (திருத்தச்) சட்டமுன்வடிவு மற்றும் 2022ஆம் ஆண்டு சென்னை பல்கலைக்கழக (திருத்தச்) சட்டமுன்வடிவு ஒருமனதாக நிறைவேற்றப்பட்டன.

இந்திய மருத்துவ முறைகளுக்கான தனி சித்த மருத்துவப் பல்கலைக்கழகம் அமைக்க வகை செய்யும் 2022ஆம் ஆண்டு தமிழ்நாடு சித்த மருத்துவப் பல்கலைக்கழகச் சட்டமுன்வடிவு, கடந்த ஏப்ரல் மாதம் 28ம் தேதி அன்று நிறைவேற்றப்பட்டது.

மேலும் 849 கவன ஈர்ப்புகள் சட்டமன்ற உறுப்பினர்களிடமிருந்து வரப்பெற்று, 127 கவன ஈர்ப்பாக அனுமதிக்கப்பட்டது.

இதையும் படிங்க:'தமிழ்நாடு அரசின் நோக்கம் குற்றத்தைத் தடுப்பதே' - முதலமைச்சர் மு.க.ஸ்டாலின்