'தடுப்பூசி செலுத்த யாரையும் கட்டாயப்படுத்தவில்லை' - அமைச்சர் மா.சுப்பிரமணியன்

தடுப்பூசி செலுத்திக் கொள்ள யாரையும் கட்டாயப்படுத்தவில்லை என்றும், அவ்வாறு சொன்னாலும் அது தவறில்லை எனவும் மருத்துவம் மற்றும் மக்கள் நல்வாழ்வுத்துறை அமைச்சர் மா.சுப்பிரமணியன் தெரிவித்துள்ளார்.

சென்னை:எழும்பூரில் உள்ள தமிழர் தந்தை சி.பா.ஆதித்தனாரின் 117 ஆவது பிறந்தநாளை முன்னிட்டு, செய்தித்துறை அமைச்சர் மு.பெ.சாமிநாதன், சமூகநலன்- மகளிர் உரிமைத்துறை அமைச்சர் கீதாஜீவன், மருத்துவம் மற்றும் மக்கள் நல்வாழ்வுத்துறை அமைச்சர் மா.சுப்பிரமணியன் ஆகியோர் அவரது சிலைக்கு மாலை அணிவித்து மலர் தூவி மரியாதை செலுத்தினர்.

பின்னர் செய்தியாளர்களிடம் பேசிய அமைச்சர் மா.சுப்பிரமணியன், "முதலமைச்சரின் அறிவுறுத்தலில் படி கடந்த செப்.12 ஆம் தேதி தமிழ்நாடு முழுவதும் 40 ஆயிரம் முகாம்கள் மூலம் 20 லட்சம் பேருக்கு கரோனா தடுப்பூசி செலுத்த இலக்கு நிர்ணயித்து, மக்களிடம் ஏற்பட்ட விழிப்புணர்வின் காரணமாக 28 லட்சத்து 91 ஆயிரம் பேர் தடுப்பூசி செலுத்திக் கொண்டனர்.

அதனைத் தொடர்ந்து செப்.19 ஆம் தேதி இரண்டாவது மெகா தடுப்பூசி முகாம் நடத்தப்பட்டது. அதில் 16 லட்சத்து 43 ஆயிரத்திற்கும் மேற்பட்டோருக்கு தடுப்பூசி செலுத்தப்பட்டது.

சி.பா.ஆதித்தனாரின் 117 ஆவது பிறந்தநாள்

ஒன்றிய அரசிடம் கோரிக்கை

தமிழ்நாட்டிற்கு வாரந்தோறும் 50 லட்சம் டோஸ் தடுப்பூசிகள் வேண்டுமென்று முதலமைச்சர் ஸ்டாலின் ஒன்றிய அரசுக்கு கடிதம் எழுதினார். அதனடிப்படையில் 28 லட்சம் டோஸ் தடுப்பூசிகள் தமிழ்நாட்டிற்கு வந்தன.

அதை அனைத்து மாவட்டங்களுக்கும் பிரித்து அனுப்பப்பட்டு, மூன்றாவது மெகா தடுப்பூசி முகாம் 23 ஆயிரம் முகாம்கள் மூலம் 15 லட்சம் பேருக்கு தடுப்பூசி செலுத்த இலக்கு நிர்ணயிக்கப்பட்டு 24 லட்சத்து 93 ஆயிரம் பேருக்கு செலுத்தப்பட்டது. இன்று தடுப்பூசி முகாம்களுக்கு விடுமுறை அளிக்கப்பட்டுள்ளது.

யாரையும் கட்டாயப்படுத்தவில்லை

தற்போது மூன்று லட்சம் அளவிற்கு தடுப்பூசிகள் கையிருப்பில் உள்ளன. முதலமைச்சரின் வாரந்தோறும் 50 லட்சம் தடுப்பூசிகள் என்ற கோரிக்கையை ஒன்றிய அரசு நிறைவேற்றுமானால், இந்த வாரம் நான்காவது மெகா தடுப்பூசி முகாம் நடைபெறும்.

நடைபெற்ற மூன்று தடுப்பூசி முகாம்களிலும் பொதுமக்கள் சாரை, சாரையாய் வந்து தடுப்பூசி செலுத்திக்கொண்டு, அதை ஒரு தடுப்பூசி திருவிழாவாகவே நடத்தினர். தடுப்பூசி செலுத்திக் கொள்ள யாரையும் கட்டாயப்படுத்தவில்லை. அப்படியே சொன்னாலும் அதில் தவறொன்றுமில்லை" என்று கூறினார்.

இதையும் படிங்க:சேலம் சிறுமியை நேரில் சந்தித்து நலம் விசாரித்தார் முதலமைச்சர்