புதிய கல்விக் கொள்கை பற்றி தெரிந்து பேசுங்கள்: பாஜக தலைவர் முருகன்!

சென்னை: புதிய கல்விக் கொள்கை பற்றி விமர்சிக்கும் முன் அதை முழுமையாக படித்து உணர வேண்டும் என பாஜக மாநிலத் தலைவர் முருகன் தெரிவித்துள்ளார்.

மத்திய அரசின் புதிய கல்விக் கொள்கைக்கு தமிழ்நாட்டில் பெரும் எதிர்ப்பு எழுந்துள்ள நிலையில், தமிழ்நாடு பாஜக தலைவர் முருகன் புதிய கல்விக் கொள்கை பற்றி அறிக்கை வெளியிட்டுள்ளார்.

அதில், ''நாட்டின் பள்ளிக்கல்வி மற்றும் உயர் கல்வி முறையில் பெரும் மாற்றத்தை உருவாக்கி இந்திய பள்ளிகளின் கல்வியை உலகத் தரத்திற்கு உயர்த்தும், மிகச் சிறந்த புதிய கல்விக் கொள்கையை மத்திய அரசு வெளியிட்டுள்ளது. புகழ்பெற்ற விஞ்ஞானி கே.கஸ்தூரி ரங்கன் தலைமையிலான “தேசிய கல்வி வரைவுக் கொள்கைக்கான குழு” ஜூன் 2017இல் அமைக்கப்பட்டது. இக்குழு மே 31 2019 அன்று தங்களது தேசிய வரைவுக் கொள்கையை அளித்தது. அதன்மீது ஆலோசனைகள், கருத்துக்கள் பெறப்பட்டன.

ஒவ்வொரு மாணவரின் தனித்தன்மையை, திறமையை வெளிக்கொணரும் வகையில் புதிய கல்விக் கொள்கை 2020 உருவாக்கப்பட்டுள்ளது.
மழலையர் கல்வி முதல் இடைநிலைக் கல்வி வரை அனைத்து மட்டத்திலும், பள்ளிக் கல்விக்கு உலக அளவிலான அணுகுமுறையை புதிய கல்விக் கொள்கை உறுதி செய்கிறது.

மொத்த உள்நாட்டு உற்பத்தியில் இன்றைய நிலையில் 16 லட்சம் கோடியை ஒதுக்கீடு செய்ய திட்டமிடப்படும். இதன் காரணமாக, புதிய கல்விக் கொள்கையின் நோக்கங்கள் முழுமைடையும் என்பது உறுதி. புதிய கல்விக் கொள்கையில், தாய்மொழிக் கல்விக்கு முக்கியத்துவம் அளிக்கப்பட்டுள்ளது. மும்மொழித்திட்டம் என்பது தமிழ்நாட்டைத் தவிர அனைத்து மாநிலங்களிலும் இப்போதும் செயல்படுத்தப்படுகிறது.

சமஸ்கிருதம், இந்தி என்பது எந்த மாநிலத்திலும் கட்டாயப்படுத்தப்படவில்லை. தமிழ் மக்களை ஏமாற்றுவதற்காகவே இது போன்ற பொய் பரப்புரைகளை செய்கிறார்கள். புதிய கல்விக் கொள்கை நாட்டின் வளர்ச்சிக்கானது. மாணவர்களின் எதிர்காலத்துக்கானது. இதையும் சுய நோக்கத்தோடு, காழ்ப்புணர்ச்சியோடு விமர்சிப்பதை கண்டிக்கிறேன். புதிய கல்விக் கொள்கை பற்றி விமர்சிக்கும் முன், அதை முழுமையாக படித்து உணர வேண்டும் என தெரிவிக்கப்பட்டுள்ளது.

இதையும் படிங்க:புதிய கல்விக் கொள்கை அல்ல; பழைய மனுதர்ம ‘வர்ண’ பூச்சு - ஸ்டாலின் சாடல்