கரோனா: கவுரவ விரிவுரையாளர்களுக்கு ஆதரவு கரம் நீட்டுமா, தமிழ்நாடு அரசு?

சென்னை: கரோனா தொற்றால் இறந்த கவுரவ விரிவுரையாளர்களின் குடும்பத்திற்கு அரசு இழப்பீட்டுத் தாெகை வழங்க வேண்டும் என கோரிக்கை விடுக்கப்பட்டுள்ளது.

தமிழ்நாடு அனைத்து அரசு கல்லூரி கவுரவ விரிவுரையாளர் சங்கத்தின் மாநிலத் தலைவர் தங்கராஜ் அறிக்கை ஒன்றினை வெளியிட்டுள்ளார். அதில், கரோனா தொற்றால் இறந்த கவுரவ விரிவுரையாளர்களின் குடும்பத்திற்கு அரசு இழப்பீட்டுத் தாெகை வழங்க வேண்டும் என வலியுறுத்தியுள்ளார்.

இழப்பீட்டுத் தொகை வழங்குமா அரசு?

மேலும் அவர் வெளியிட்டுள்ள அறிக்கையில், 'தமிழ்நாடு முழுவதும் உள்ள 149 அரசு கலைக் கல்லூரிகளில், 108 கல்லூரிகள் அரசு கல்லூரிகள், 41 அரசு கல்லூரிகள் பல்கலைக்கழக உறுப்புக் கல்லூரிகளாக இருந்து அரசு கல்லூரியாக மாற்றம் செய்யப்பட்டுள்ளன.

108 அரசு கல்லூரியில் யுஜிசி தகுதியுடன் பணிபுரிந்து வரும் கவுரவ விரிவுரையாளர்களுக்கும், யுஜிசி தகுதி இல்லாமல் தொகுப்பு ஊதியத்தில் பணியாற்றிவரும் கவுரவ விரிவுரையாளர்களுக்கும் சம்பளமாக ரூ.20 ஆயிரம் வழங்கப்பட்டு வருகிறது.

பல்கலைக்கழக உறுப்புக் கல்லூரிகளாக இருந்து அரசு கல்லூரியாக மாற்றம் செய்யப்பட்ட 41 கல்லூரியில் பணியாற்றும் கவுரவ விரிவுரையாளர்களுக்கு வழங்கும் ஊதியத்தை, தமிழ்நாடு அரசானது பல்கலைக்கழகமே தர அறிவுறுத்தியுள்ளது. இந்தக் கல்வி ஆண்டு ஜுன் முதல் தமிழ்நாடு அரசு ஊதியத்தை தரவேண்டும் என இங்கு பணியாற்றும் கவுரவ விரிவுரையாளர்கள் எதிர்பார்க்கின்றனர்.

குறைந்த ஊதியம்

மதுரை காமராஜர் பல்கலைக்கழகம் மற்றும் பாரதியார் பல்கலைக்கழகம் மட்டுமே தனது கட்டுப்பாட்டில் இயங்கும் உறுப்புக் கல்லூரி கவுரவ விரிவுரையாளர்களுக்கு 20 ஆயிரம் ரூபாய் சம்பளமாக வழங்கி வருகிறது.

பிற பல்கலைக்கழகங்கள் இன்னும் ஊதியத்தை உயர்த்தி தர, முன் வராதது கரோனா பேரிடர் காலத்தில் மிகுந்த வேதனை அளிப்பதாகக் கூறுகின்றனர்.

கவுரவ விரிவுரையாளர்களுக்கு ஜூன் முதல் ஏப்ரல் மாதம் வரை 11 மாதத்திற்கு மட்டுமே சம்பளம் வழங்கப்பட்டு வந்தது.

கடந்தாண்டு தமிழ்நாட்டில் வேகமாகப் பரவி வந்த கரோனா தொற்று காரணமாக யுஜிசி வழிகாட்டுதலின்பேரில் அரசு கல்லூரிகளில் ஆன்லைன் வகுப்புகள் மூலமாகவே பாடம் நடத்தப்பட்டு வருகின்றது.

முதலாமாண்டு மாணவர் சேர்க்கை காலதாமதமாக நடந்ததால் தனியார் கல்லூரிகள் உட்பட்ட அனைத்து கல்லூரிகளிலும் மே மாதம் முழுவதுமாக ஆன்லைன் வகுப்புகள் மூலம் பாடம் எடுத்து வருகின்றனர்.

கரோனா பேரிடர் காலத்தைக் கருத்தில் கொண்டு முதலமைச்சரும், உயர் கல்வித்துறை அமைச்சரும் 149 அரசு கல்லூரிகளில் பணியாற்றும் கவுரவ விரிவுரையாளர்களுக்கு மே மாதத்திற்கான ஊதியத்தை வழங்கிட வேண்டும்.

ஒரு சில அரசு கல்லூரி கவுரவ விரிவுரையாளர்கள் கரோனா தொற்று காரணமாக உயிரிழந்துள்ளனர்.

அத்தகைய கவுரவ விரிவுரையாளர் குடும்பத்திற்கு குறைந்தபட்ச இழப்பீடு தொகையாவது வழங்கிட வேண்டும்' எனக் குறிப்பிடப்பட்டுள்ளது.

இதையும் படிங்க:அடுத்த 2 நாள்களில் எங்கெங்கு மழை பெய்யும்?