தமிழ்நாடு சட்டப்பேரவைத் தேர்தல் வாக்கு எண்ணிக்கையில் அதிகமான தொகுதிகளில் திமுக முன்னிலையில் உள்ளது. இந்நிலையில் பல்வேறு அரசியல் கட்சித் தலைவர்கள் மு.க. ஸ்டாலினுக்கு வாழ்த்துகளைத் தெரிவித்துவருகின்றனர்.
இந்நிலையில், திமுகவுடன் கூட்டணி வைத்திருக்கும் விசிகவின் தலைவரும், மக்களவை உறுப்பினருமான தொல். திருமாவளவன் வாழ்த்துகளைத் தெரிவித்துள்ளார். இது தொடர்பான அவரது ட்விட்டர் பதிவில், "#தமிழகத்தின்_முதல்வராகப் பதவி ஏற்கவிருக்கும் #மு_க_ஸ்டாலினுக்கு விடுதலைச் சிறுத்தைகளின் மனம் நிறைந்த #வாழ்த்துகள். அம்பேத்கர், பெரியார், அண்ணா, கலைஞர் ஆகியோரின் வழியில் #சமூகநீதியைக் காக்கவும் தமிழ், தமிழர் நலன்களை மீட்கவும் #நல்லாட்சி வழங்கிட வாழ்த்துகள்" எனக் குறிப்பிட்டுள்ளார்.