வசூல் வேட்டை நடத்த தான் மின் கட்டண உயர்வுக்காக கருத்து கேட்பு கூட்டம் நடத்துகின்றனர் - அண்ணாமலை பேட்டி

திமுக அறிவித்த வாக்குறுதியில் பாதிக்குமேல் தேவையில்லாத இலவசங்கள். 20 ஆண்டுகளுக்கு முன்பு தமிழகத்தில் பணம் இருந்தது, தற்போது அதிகம் கடன் வாங்கும் மாநிலமாக மாறியுள்ளது என பாஜக மாநில தலைவர் அண்ணாமலை விமர்சித்துள்ளார்.

சென்னை: நடிகர் ரஜினிகாந்த் தொடங்க இருந்த கட்சியில் தலைமை ஒருங்கிணைப்பாளராக அறிவிக்கப்பட்டு பின்னர் தனிக்கட்சி தொடங்கிய அர்ஜுனமூர்த்தி மீண்டும் தன்னை பாஜகவில் இணைத்துக் கொண்டார். சென்னை தியாகராய நகரிலுள்ள கமலாலயத்தில் அண்ணாமலை அர்ஜூன மூர்த்திக்கு உறுப்பினர் அட்டையை வழங்கினார். பின்னர் செய்தியாளர்களிடம் பேசிய பாஜக மாநில தலைவர் அண்ணாமலை,

"அர்ஜூனமூர்த்தி முன்பு பாஜகவில் பயணம் செய்து பல பொறுப்பு வகித்தவர், தொழில்நுட்பம் தெரிந்தவர். சூப்பர் ஸ்டாருடன் இணைந்து அரசியல் களம்சென்ற நிலையில் மீண்டும் வந்துவிட்டார். சித்தாந்தம், கொள்கையை ஏற்கும் யாரும் பாஜகவிற்கு வர அனுமதி உண்டு.
அர்ஜூன மூர்த்தி கட்சியிலிருந்து விலகி சென்றபோதும், இப்போது மீண்டும் பாஜகவில் இணையும் போதும் ஏன் என்று கேட்கவில்லை. அவரது கடின உழைப்பால் கட்சி உயரும் என்ற நம்பிக்கை இருக்கிறது.

மின் கட்டண உயர்வு அரசுக்கு அவப்பெயரை ஏற்படுத்தியுள்ளது. தற்போது மின் கட்டண உயர்வுக்காக மக்கள் கருத்தை கேட்க முயற்சிப்பது நாடகம். மின் கட்டண விலையை குறைப்பதாக கூறி பெரிய தொழில் நிறுவனங்களுடன் மின்சாரத்துறை அமைச்சர் சார்பில் பேரம் பேசி வருகின்றனர். மக்கள் கருத்து கேட்பு என்ற கபட நாடகத்தை நிறுத்த வேண்டும். வசூல் வேட்டை நடத்ததான் கருத்து கேட்பு கூட்டம் நடத்துகின்றனர்.

ஆன்லைன் ரம்மியை தமிழக அரசு தடை செய்ய ஆதரவாக இருப்போம்

ஆன்லைன் ரம்மியை தடை செய்ய தொடர்ந்து கருத்து கேட்டு கொண்டே இருந்தால் அடுத்து தற்கொலை மூலம் சிந்தப்படும் ரத்தத்திற்கு ஆளும் கட்சி அமைச்சர்கள், முதல்வர்தான் பொறுப்பேற்க வேண்டும். ஆன்லைன் ரம்மியை தமிழக அரசு உடனடியாக தடை செய்ய வேண்டும். ஒரு வழியாக ஊட்டச்சத்து பெட்டகத்தை ஆவினில் தயாரிக்க அரசு முன்வந்துள்ளது என்பது வரவேற்கத்தக்கது. கர்பிணி தாய்மார்களுக்கு ஆவின் ஊட்டச்சத்து பெட்டகம் வழங்கும் ஒப்பந்தத்திற்கு தமிழக அரசு முன்வர வேண்டும்.

மக்களுக்கு செய்ய வேண்டிய கடமை

இலவசங்கள் மூலம் ஆட்சியை பிடிப்பது தான் தவறு. குடிமகனுக்கு அரசு செய்யும் கடமைகள் தவறு அல்ல. Public goods எனும் சுகாதாரம், கல்வி மக்களுக்கு இலவசமாக வழங்கப்பட வேண்டும். இது மக்களின் அடிப்படை உரிமை. வீடு, எரிவாயு, குடிநீர், வங்கி கணக்கு இவற்றை இலவசம் என்ற பெயரில் குறிப்பிடாமல் மத்திய அரசு வழங்குகிறது. இதை இலவசமாக கருதாமல் மக்களுக்கு செய்ய வேண்டிய கடமையாக பாஜக கருதுகிறது. ராஜஸ்தானில் தேர்தல் வருவதால் காங்கிரஸ் அரசு செல்போன், டேட்டா இலவசம் என்று கூறியுள்ளது.

தேர்தல் அறிக்கையில் இலவசம் எனும் பெயரில் பொருளாதார திட்டமிடல் இன்றி திமுக பலவற்றை அறிவித்து ஆட்சிக்கு வந்தது. விவசாயிகளுக்கான இலவச மும்முனை மின்சாரம் பாஜகவின் இலக்கு. தமிழகம் Learning of outcome ல் கல்வியில் பின்தங்கியுள்ளது. Lipstick அடித்தது போன்ற பெண்கள் இலவச பேருந்து முறையாக இயக்கப்படவில்லை.

பாஜகவின் தலைவர்கள் இலவசம் தொடர்பாக அதிகாரபூர்வ கருத்தை கூறவில்லை, இலவசங்கள் தரும் கட்சிகளுடன் கூட்டணி வைக்க மாட்டோமா என்பது தொடர்பாக கட்சியின் தேசிய தலைவர்கள்தான் கூற வேண்டும். மாநில தலைவராக நான் கருத்து கூற முடியாது. இலவசம் தருகிறது என்பதற்காக எந்த கட்சி மீதும் பழி போட்டுவிட முடியாது. அதை அந்த கட்சியினர் வேறு மாதிரி பார்க்கலாம். ஆனால் மக்கள் புரிந்து கொள்ள வேண்டும்.

அரசியலமைப்பு சட்டப்படி மாநிலங்களுக்கு என தனித்தனி அதிகாரங்கள் உள்ளன. ஊரடங்கு உத்தரவு பிறப்பிக்கப்பட்டபோது கூட மாநிலங்களை கேட்டுதான் முதலமைச்சர் முடிவு செய்தார்.

இந்தியா சார்பில் பேசுவேன்

72 சதவீத தமிழக மக்கள் சமூக வலைதளங்களில் இருக்கின்றனர். ஆன்லைன் ரம்மி சமூக வலைதளங்களையே சார்ந்துள்ளது. தமிழகத்தில் ஆன்லைன் ரம்மியல் 30 பேர் இறந்துள்ளனர். எனவே மற்ற மாநிலங்களை காட்டிலும் தமிழகத்தில் அதிகம் ஆன்லைன் ரம்மி தற்கொலை நடப்பதால் தமிழகத்தில் தடை செய்ய கூறுகிறோம். நான் தமிழக பாஜக தலைவர் எனவே தமிழக தடை தொடர்பாக மட்டுமே பேச முடியும், என்னை டெல்லியில் பொறுப்பு கொடுத்து அமர வைத்தால் இந்தியா சார்பில் பேசுவேன்.

அனைத்து ஜாதியினரும் அர்ச்சகர் ஆக பாஜக ஆதரவு

டிக்டாக், சீன செயலி மீதான தடை நாட்டின் பாதுகாப்பு சார்ந்தது. எனவே இந்தியளவில் தடை செய்யப்பட்டது. தமிழகத்தில் பல இளைஞர்கள் ஆன்லைன் ரம்மிக்கு addiction ஆகி விட்டனர். அனைத்து சாதியினரும் அர்ச்சகர்கள் ஆவதை பாஜக தொடர்ந்து ஆதரித்து வருகிறது. ஆனால் சில கோயில்களில் ஆகமங்கள் இருக்கிறது. அதையும் கருத்தில் கொள்ள வேண்டும். அதை மாற்ற முயற்சிக்க வேண்டாம். ஆகமங்கள் சாதி ரீதியாக பாகுபாடு பார்க்கவில்லை. சில கோயில்களில் பெண்கள் தான் அர்ச்சிக்கின்றனர்.

திமுகவின் வாக்குறுதிகள் தேவையில்லாத இலவசங்கள்

கர்ப்பிணி பெண்களுக்கு உதவவும், 18 வயதுக்கு கீழான பெண்களுக்கு உதவவும் பிரதமர் திட்டம் இருக்கிறது. எனவே புதுவையில் இன்று அறிவித்துள்ளது தவறு கிடையாது. இலவசம் வேறு, அரசின் கடமை வேறு. திமுகவின் 506 தேர்தல் வாக்குறுதியில் பாதிக்கு மேல் தேவையில்லாத இலவசங்கள்.

திமுக அரசின் ஆட்சிக் காலத்தில் 20 சதவீதத்திற்கு மேல் முடிந்து விட்டது. 2026 தேர்தல் அறிக்கையில் வீட்டிலேயே இருங்கள் 10 ஆயிரம் தந்து விடுகிறேன் என்று திமுக கூறினால் அது தவறு. கிரிமினல் குற்றம். அதன் பெயர்தான் இலவசம். போதுமான நிதி இல்லாதபோது அவசியமற்ற இலவசங்கள் அறிவிப்பது தவறு.

தமிழகம் அதிகம் கடன் வாங்கும் மாநிலம்

தமிழ்நாட்டில் பத்திரிகைக்கு கம்பீரமாக பேட்டி தந்துவிட்டு, டெல்லியில் அறைக்குள் சென்று பிரதமரிடம் மாநில அரசிடம் பணம் இல்லை காப்பாற்றுங்கள் என்று கூறுவது எப்படி சரியாகும். 20 ஆண்டுக்கு முன்பு தமிழக அரசிடம் பணம் அதிகமாக இருந்தது. அதனால் இலவசங்களை அறிவித்தனர்.

ஆனால் இன்று நிதி இல்லாமல் அதிகமாக கடன் வாங்கும் மாநிலமாக மாறி விட்டது. எனவே இப்போது இலவச அறிவிப்பு தேவையில்லை. 7 லட்சம் கோடி கடனில் இருக்கிறது. பின்பு சுகாதாரம், பள்ளி கல்விக்கு எப்படி நிதி ஒதுக்க முடியும். பள்ளி கல்விக்கு ஒதுக்கப்படும் நிதியில் 92 சதவீதம் மாத சம்பளமாகவே போகிறது என அமைச்சர் கூறுகிறார்.

இந்தியாவும் இலங்கையும் இரட்டையர்கள்

இந்தியாவின் எதிர்ப்பை மீறி சீனக் கப்பல் இலங்கை வருகை துரதிருஷ்டவசமானது என்றாலும் இந்தியாவும் இலங்கையும் கலாசார ரீதியில் இரட்டையர்கள் என்று மோடி கூறியுள்ளார். இலங்கை, வரும் காலத்தில் யார் தனக்கு உண்மையான நண்பன் என யோசிக்கும். சீனாதான் இலங்கை அதிகம் கடன் பட காரணம்" என கூறினார்.

இதையும் படிங்க:இலவசங்களால் முன்னேறியுள்ளோம்... உச்ச நீதிமன்றத்தில் திமுக வாதம்