சென்னை: நண்பனின் பிறந்த நாள் என பெற்றோரிடம் கூறி விட்டு, மாணவர்கள் சிலர் குழுவாக சேர்ந்து தனியார் தங்கும் விடுதியில் அறை எடுத்து, போதை ஊசி போட்டுக் கொண்டதாக கூறப்படுகிறது. இதில் சக மாணவர் ஒருவருக்கு போதை அதிகமானதாகவும், இதனால் ஏற்பட்ட வலிப்பால் அவர் உயிரிழந்ததாகவும் கூறப்படுகிறது.
பெரும் அதிர்வலையை ஏற்படுத்தியுள்ள இந்த சம்பவம் குறித்து போலீஸார் வழக்குப்பதிவு செய்து விசாரணை மேற்கொண்டு வருகின்றனர். நேற்று(நவ. 26) இரவு மாணவர்கள் சிலர் ஒரு மாணவரை தூக்கிக் கொண்டு சென்னை ராயப்பேட்டையில் உள்ள அரசு மருத்துவமனைக்கு வந்துள்ளனர்.
அந்த மாணவரின் பெயர் ராகுல் என்று புற நோயாளிகள் பதிவில் குறிப்பிடப்பட்டது. ராகுலுக்கு என்ன ஆனது என்று சக மாணவர்களிடம் கேட்டவாறு மருத்துவர்கள் சிகிச்சை அளிக்க முயற்சித்துள்ளனர். ஆனால் துரதிஷ்டவசமாக மாணவர் ராகுல் ஏற்கனவே இறந்துவிட்டார் என மருத்துவர்கள் கூறியுள்ளனர்.
மருத்துவர்கள் கூறிய தகவலை கேட்டு அதிர்ந்துபோன சக மாணவர்கள், யாரிடமும் தெரிவிக்காமல் அங்கிருந்து தப்பி ஓடியுள்ளனர். இதனால் சந்தேகம் அடைந்த ராயப்பேட்டை அரசு மருத்துவமனை நிர்வாகம், சம்பவம் தொடர்பாக போலீசாருக்கு தகவல் அளித்துள்ளது. தகவல் அறிந்து சம்பவ இடத்திற்கு வந்த போலீஸார், மருத்துவர்களிடம் விசாரணை நடத்தியுள்ளனர்.