உள்ளாட்சி தேர்தலிலும் அதிமுக வெற்றிபெறும்- அமைச்சர் ஜெயக்குமார்

சென்னை: இடைத்தேர்தலில் பெற்ற வெற்றியைப் போலவே உள்ளாட்சித் தேர்தலிலும் அதிமுக மகத்தான வெற்றியைப் பெறும் என அமைச்சர் ஜெயக்குமார் தெரிவித்துள்ளார்.

சென்னை ராயப்பேட்டையிலுள்ள அதிமுக தலைமை அலுவலகத்தில் உள்ளாட்சி தேர்தல் தொடர்பாக மாவட்ட செயலாளர்கள், எம்.எல்.ஏ.,க்கள் கூட்டம் முதலமைச்சர் எடப்பாடி பழனிசாமி, துணை முதலமைச்சர் ஓ. பன்னீர்செல்வம் தலைமையில் நடைபெற்றது.

இந்த ஆலோசனைக் கூட்டத்திற்கு பிறகு அமைச்சர் ஜெயக்குமார் செய்தியாளர்களை சந்தித்தார். அப்போது பேசிய அவர், உள்ளாட்சியிலும் தங்களது நல்லாட்சி தொடர வேண்டும் என்ற அடிப்படையில் இந்தக் கூட்டத்தில் பல முக்கிய முடிவுகள் எடுக்கப்பட்டுள்ளன.

உள்ளாட்சித் தேர்தலில் தங்களின் பிரதான எதிரியான திமுகவை மண்ணோடு மண்ணாக ஆக்கும் வகையில் செயல்பட்டு வெற்றிபெற உழைக்குமாறு மாவட்ட செயலாளர்களுக்கும், முக்கிய நிர்வாகிகளுக்கும் இக்கூட்டத்தின் மூலம் அறிவுறுத்தப்பட்டது.

மேலும், மக்களோடு இருந்து மக்களுக்காக உழைத்ததன் காரணமாகவே தெற்கில் நாங்குநேரியிலும், வடக்கில் விக்கிரவாண்டியிலும் மகத்தான வெற்றியை அதிமுக பெற்றது. ஆனால் எங்களுக்கு கிடைத்துள்ள அங்கீகாரம்போல் திமுகவிற்கு மக்கள் கொடுக்கவில்லை. இதேபோல் வரவுள்ள உள்ளாட்சி தேர்தலிலும், 2021ஆம் ஆண்டு நடைபெறவுள்ள சட்டப்பேரவைத் தேர்தலிலும் அதிமுக வெற்றி பெறுவது நிதர்சனமான உண்மை.

வேலூர் தேர்தலில் குறைந்த வாக்குகள் வித்தியாசத்தில் பெற்ற வெற்றியை தனது மகன் உதயநிதிக்கு அர்பணிப்பதாக மார்தட்டிய ஸ்டாலின், தற்போது இடைத்தேர்தல் தோல்வி குறித்து வாய்திறக்காதது ஏன்?

தற்போதுள்ள திமுக கட்சியில் ஒற்றுமை இல்லாத நிலை ஏற்பட்டுள்ளது. இதனால் மனக்குழப்பத்திலுள்ள ஸ்டாலின் பலவற்றை வாய்தவறி உளறி வருகிறார். தினமொரு உளரல் என்றால், அது திமுக தலைவர் ஸ்டாலினைத்தான் குறிக்கும்.

உள்ளாட்சி தேர்தலை தள்ளி வைக்கும் எண்ணமோ, காலம் தாழ்த்தும் எண்ணமோ அதிமுகவிற்கு இல்லை. தேர்தலைக் கண்டு அஞ்சவேண்டியவர்கள் திமுகவினர்தான் என்றார்.

இதையும் படிங்க:இடைத்தேர்தல் தொகுதி எம்.எல்.ஏக்கள் இன்று பதவியேற்பு