சென்னை: நடிகர் விஜய் தற்போது, இயக்குநர் நெல்சன் திலீப் குமார் இயக்கத்தில் 'பீஸ்ட்' படத்தில் நடித்து வருகிறார்.
இப்படத்தின் படப்பிடிப்பு கடந்த சில நாட்களாக டெல்லியில் நடந்து வருகிறது. இதுகுறித்த புகைப்படங்கள் சமூக வலைத்தளத்தில் வெளியானது. அதனை விஜய் ரசிகர்கள் தாறுமாறாக வைரலாக்கினர்.
இப்படத்தின் படப்பிடிப்பு இந்த ஆண்டு இறுதிக்குள் முடிவடைந்துவிடும் என்று கூறப்படுகிறது. இப்படம் நிறைவடைவதற்கு முன்பாகவே, தளபதி விஜய்யின் அடுத்த படம் குறித்த அதிகாரப்பூர்வ தகவல்கள் வெளியாகியுள்ளன.
தளபதி 66
தெலுங்கு சினிமாவில் முன்னணி இயக்குநராக வலம் வருபவர், வம்சி பைடிபள்ளி. இவரது இயக்கத்தில் மகேஷ்பாபு நடித்த 'மகரிஷி' திரைப்படம் சிறந்த பொழுதுபோக்கு திரைப்படத்திற்கான தேசிய விருது பெற்றது.
முன்னதாக இவரது இயக்கத்தில் நடிகர் விஜய் நடிக்க உள்ளதாகத் தகவல்கள் பரவி வந்தன. 'பீஸ்ட்' படத்தைத் தொடர்ந்து தனது 66ஆவது படமாக வம்சி இயக்கத்தில் விஜய் நடிக்கவுள்ளார். இதுகுறித்த அதிகாரப்பூர்வ அறிவிப்பு புகைப்படங்கள் வெளியிடப்பட்டுள்ளன.
அப்படமானது தமிழ், தெலுங்கு ஆகிய இரண்டு மொழிகளில் தயாராக உள்ளது. மேலும் பிரபல தெலுங்கு தயாரிப்பாளர் தில் ராஜு இப்படத்தைத் தயாரிக்க உள்ளார்.
இதையும் படிங்க: வாலை சுருட்டு... இன்று மாலை ருத்ர தாண்டவம் லிரிக் வீடியோ