சென்னை: விம்கோ நகர் மெட்ரோ ரயில் நிலையத்தில் இன்று (நவ 6) காலை 11.20 மணியளவில் மேல்நிலை மின்சார உபகரணங்களில் திடீர் தொழில்நுட்ப கோளாறு ஏற்பட்டது. இதன் காரணமாக விம்கோ நகர் மெட்ரோ ரயில் நிலையத்தில் இருந்து சுங்கச்சாவடி மெட்ரோ ரயில் நிலையம் வரை 9 நிமிட இடைவெளியிலும், ஒரு வழிப்பாதையில் மெட்ரோ ரயில்கள் 20 நிமிட இடைவெளியிலும் இயக்கப்பட்டன.
அதேநேரம், நீல வழித்தடத்தில் சுங்கச்சாவடி மெட்ரோ ரயில் நிலையத்தில் இருந்து ஏ.ஜி.டி.எம்.எஸ், நந்தனம் வழியாக விமான நிலையம் வரை செல்லும் மெட்ரோ ரயில் சேவைகள் வழக்கம் போல் 9 நிமிட இடைவெளியில் இயக்கப்பட்டன. இந்நிலையில், விம்கோ நகர் மெட்ரோ ரயில் நிலையத்தில் மேல்நிலை மின்சார உபகரணங்களில் ஏற்பட்ட தொழில்நுட்ப கோளாரை சரி செய்யும் பணியில் தொழில் நுட்ப வல்லுநர்கள் துரிதமாக ஈடுபட்டனர்.