அரசு உதவி பெறும் பள்ளிகளுக்கும் காலை சிற்றுண்டி திட்டத்தை விரிவுப்படுத்த வேண்டும் - தமிழ்நாடு ஆரம்பப்பள்ளி ஆசிரியர் கூட்டணி வலியுறுத்தல்

Chief Minister's Breakfast Scheme:அரசு உதவி பெறும் பள்ளி மாணவர்களுக்கும் காலை சிற்றுண்டித் திட்டத்தை விரிவுப்படுத்த கோரி தமிழ்நாடு ஆரம்பப்பள்ளி ஆசிரியர் கூட்டணி சார்பில் சென்னையில் மாபெரும் பேரணி நடத்தப்பட்டது.

சென்னை:'அரசு உதவி பெறும் பள்ளி மாணவர்களுக்கும், அரசுப் பள்ளிகளில் பயிலும் 6, 7, 8ஆம் வகுப்பு மாணவர்களுக்கும் காலை சிற்றுண்டித் திட்டம் (Chief Minister's Breakfast Scheme) விரிவுபடுத்தப்பட வேண்டும்' என வலியுறுத்தி ஆசிரியர்கள் இன்று (செப்.29) பேரணி மேற்கொண்டனர்.

தமிழ்நாடு ஆரம்பப்பள்ளி ஆசிரியர் கூட்டணியின் சார்பில் கோரிக்கைகளை வலியுறுத்தி சென்னையில் கோட்டை நோக்கி பேரணி நடைபெற்றது. சென்னையில் எழும்பூர் லாங்ஸ் கார்டன் ரோடு ரவுண்டனாவிலிருந்து தொடங்கிய பேரணிக்கு தமிழ்நாடு ஆரம்பப்பள்ளி ஆசிரியர் கூட்டணியின் பேரணியை சிஐடியு மாநிலத் தலைவரும், முன்னாள் சட்டமன்ற உறுப்பினருமான அ.சவுந்தரராசன் தொடக்கி வைத்து பேசினார். பேரணி எழும்பூர் ராஜரத்தினம் ஸ்டேடியம் சென்றடைந்தது.

அப்போது தமிழ்நாடு ஆரம்பப்பள்ளி ஆசிரியர் கூட்டணியின் மாநில பொதுச் செயலாளர் மயில் கூறும்போது, 'தமிழ்நாடு முதலமைச்சர் கடந்த சில நாட்களுக்கு முன்பு தேர்தல் வாக்குறுதியில் 99 சதவீதத்தை நிறைவேற்றிவிட்டதாக தெரிவித்துள்ளார். ஆனால், தமிழ்நாட்டில் ஆசிரியர்கள், அரசு ஊழியர்களுக்கு கொடுத்த எந்த வாக்குறுதியையும் திமுக அரசு நிறைவேற்றவில்லை.

எனவே, திமுக அரசு தனது தேர்தல் அறிக்கையில் எழுத்து மூலமாக கொடுத்த வாக்குறுதிகளின்படி அரசு ஊழியர்கள், ஆசிரியர்களுக்கு பழைய ஓய்வூதியத் திட்டத்தை நடைமுறைபடுத்த வேண்டும், 1.6.2009-க்குப் பின்பு நியமனம் பெற்ற இடைநிலை ஆசிரியர்களின் ஊதிய முரண்பாடுகளை களைய அமைக்கப்பட்டுள்ள மூவர் குழுவின் அறிக்கையை விரைவாகப் பெற்று, ஊதிய முரண்பாடு களைந்திட வேண்டும்.

1.6.2009-க்கு முன்பு சான்றிதழ் சரிபார்ப்பு முடிந்து, நிர்வாக காரணங்களால் 1.6.2009-க்குப் பின்பு நியமன ஆணை வழங்கப்பட்ட இடைநிலை ஆசிரியர்களின் ஊதிய இழப்பு உடனடியாக சரி செய்யப்பட வேண்டும். மேலும், மத்திய அரசின் இடைநிலை ஆசிரியர்களுக்கு இணையான ஊதியத்தை தமிழ்நாட்டின் அனைத்து இடைநிலை ஆசிரியர்களுக்கும் வழங்கிட வேண்டும்.

அரசு உதவி பெறும் பள்ளி மாணவர்களுக்கும், அரசுப் பள்ளிகளில் பயிலும் 6, 7, 8ஆம் வகுப்பு மாணவர்களுக்கும் காலை சிற்றுண்டித் திட்டம் விரிவுபடுத்தப்பட வேண்டும். அரசுப்பள்ளி மாணவர்களுக்கு வழங்கப்படும் அனைத்து நலத்திட்ட உதவிகளும், சலுகைகளும் அரசு உதவி பெறும் பள்ளி மாணவர்களுக்கும் வழங்கப்பட வேண்டும்.

தமிழ்நாட்டில் ஆசிரியர்கள் பதவி உயர்வு பெற தகுதித் தேர்வில் தேர்ச்சி பெற வேண்டும் என்ற சென்னை உயர் நீதிமன்றத் தீர்ப்பை எதிர்த்து, தமிழ்நாடு அரசு உடனடியாக மேல்முறையீடு செய்வதோடு, பதவி உயர்வுக்கு தகுதித் தேர்வு தேவையில்லை என்பதை கொள்கை முடிவாக அறிவிக்க வேண்டும்.

தொடர்ந்து, தமிழ்நாடு முழுவதும் அரசு மற்றும் அரசு உதவி பெறும் பள்ளிகளில் காலியாக உள்ள ஆசிரியர் மற்றும் ஆசிரியரல்லாத காலிப்பணியிடங்களை மாணவர்களின் கல்வி நலன் கருதி காலமுறை ஊதியத்தில் நிரப்பிட வேண்டும். மாநில கல்விக்கொள்கையை உருவாக்க அமைக்கப்பட்டுள்ள குழுவின் அறிக்கையை விரைந்து பெற்று, புதிய மாநிலக் கல்விக்கொள்கையை தமிழ்நாடு அரசு அமல்படுத்த வேண்டும்.

1 முதல் 5ஆம் வகுப்பு வரை பயிலும் மாணவர்களின் கல்வி நலன் கருதி எண்ணும் எழுத்தும் திட்டத்தை முற்றிலுமாக கைவிட வேண்டும். ஆசிரியர்களின் கற்பித்தல் பணியை பெருமளவில் பாதிக்கும் எமிஸ் பணிகளிலிருந்து ஆசிரியர்களை விடுவிக்க வேண்டும். ஈட்டிய விடுப்பு ஒப்படைப்பு உரிமை, உயர் கல்விக்கான ஊக்க ஊதிய உயர்வு ஆகியவற்றை மீண்டும் வழங்க வேண்டும்” என்பன உள்ளிட்ட பல கோரிக்கைகளை ஆசிரியர்கள் இப்பேரணியில் வலியுறுத்தினர். தேர்தல் அறிக்கையில் கூறியவாறு இக்கோரிக்கைகளை நிறைவேற்றாவிடில், தொடர் போராட்ட நடவடிக்கைகளில் ஈடுபடுவோம் எனவும் இவ்வமைப்பினர் கூறியுள்ளனர்.

இதையும் படிங்க:காலை சிற்றுண்டித் திட்டம் விரிவாக்கம்? முதலமைச்சர் ஆலோசனை!