'அரசுப் பள்ளிகளின் வசதிகளை மாணவர்கள் பயன்படுத்திடுக'

சென்னை: அரசுப் பள்ளி வசதி மற்றும் வாய்ப்புகளை மாணவர்களும், பெற்றோர்களும் பயன்படுத்திக் கொள்ள வேண்டும் என ஆசிரியர்கள் வேண்டுகோள் விடுத்துள்ளனர்.

இது தொடர்பாக தமிழ்நாடு ஆரம்பப்பள்ளி ஆசிரியர் கூட்டணியின் மாநில பொதுச்செயலாளர் தாஸ் வெளியிட்டுள்ள அறிக்கையில் கூறியிருப்பதாவது: ”கரோனா வைரஸ் தாக்குதலால் பள்ளி, கல்லூரிகள் திறக்கப்படாமல் உள்ளன. இந்நிலையில், மாணவர் சேர்க்கை 2020- 21இல் எப்படி நடக்குமோ என்ற கேள்வியோடு பெற்றோர்கள் இருந்தனர். மாணவர் மற்றும் ஆசிரியர்களும் அதை எதிர்பார்த்திருந்தனர்.

பெற்றோர்கள் அரசுப் பள்ளியில் சேர்ப்பதற்காக தனியார் பள்ளிகளை விட்டு அரசுப் பள்ளியை நாடிவரும் தேவையும் சூழ்நிலையும் ஏற்பட்ட காரணத்தினால் அரசுப் பள்ளி மற்றும் நிதி உதவிப் பெறும் பள்ளிகளில் மாணவர்கள் சேர்க்கைக்கு அறிவிப்பு வெளியிட வேண்டும் என்ற வேண்டுகோளை தமிழ்நாடு ஆரம்பப்பள்ளி ஆசிரியர் கூட்டணி கோரிக்கையாக முன் வைத்தது.

ஒரு பக்கம் தனியார் பள்ளிகள் இணையவழியில் மாணவர்கள் சேர்க்கையை மறைமுகமாக நடத்திக் கொண்டு வரும் நேரத்தில் அரசுப்பள்ளி மாணவர்கள் சேர்க்கை கேள்விக்குறியான நிலையை எட்டி விடும் என்ற அச்சம் மேலோங்குகிறது. ஆகவே, அரசுப் பள்ளிகளில் மாணவர் சேர்க்கைக்கான தேதியை அறிவிக்க வேண்டும் என்ற கோரிக்கையை அரசுக்கு தொடர்ந்து வலியுறுத்தி வந்தோம்.

தற்போது பள்ளிக்கல்வி அமைச்சர் தமிழ்நாட்டில் 1, 6, 11 ஆகிய வகுப்புகளுக்கான அரசுப் பள்ளி சேர்க்கை நடத்தலாம் என்ற அறிவிப்பு வெளியிட்டுள்ளதை நாங்கள் வரவேற்கிறோம். கட்டணமில்லா கல்வி, விலையில்லா பொருள்கள் ஆகியவற்றை அள்ளித் தந்த அரசுப் பள்ளியிலும், அரசு நிதியுதவி பெறும் பள்ளியிலும் இருக்கும் வாய்ப்பை பெற்றோர்கள் பயன்படுத்திக் கொள்ள ஆர்வமாக உள்ளனர்.

வாகன விபத்து ஏற்படாத வண்ணம் சொந்த ஊர் பள்ளியிலே படிக்கவைக்க வேண்டும். கரோனா நோய் தொற்று ஏற்படாமல் இருக்க பேருந்து மற்றும் ரயில் பயணங்களை தவிர்க்கும் பொருட்டு அந்தந்த ஊர் பள்ளியிலேயே சேர்ப்பதற்காக விழிப்புணர்வை பெற்றோர்கள் தற்பொழுது பெற்றுள்ளதாக அறிய முடிகிறது. அரசுப் பள்ளியில் படிக்கின்ற மாணவனுக்கு மருத்துவப் படிப்புக்கு இட ஒதுக்கீடு செய்துள்ளதால் அரசுப் பள்ளியை நாடி வரும் சூழல் ஏற்பட்டுள்ளது.

ஆரம்ப கல்வி முதல் (1 வகுப்பு முதல்) அரசுப் பள்ளிகளில் படிக்கும் மாணவர்களுக்கு முன்னுரிமை வழங்கும் சட்ட முன் வடிவம் கொண்டு வரவேண்டும். தமிழ்நாடு அரசு கட்டாய கல்வி சட்டத்தில் மாணவர்களை தனியார் பள்ளியில் சேர்ப்பதை தவிர்க்க வேண்டும் என்றும் இதனால் அரசின் நிதி தனியார் பள்ளிக்கு செல்வதை (சுமார் 450 கோடி) தடுத்து, அரசுப் பள்ளியிலேயே மாணவரை சேர்ப்பதால் சுமார் ஒரு லட்சம் மாணவர்கள் அரசுப் பள்ளியில் சேரும் வாய்ப்பு உருவாகும். அரசு பள்ளி கட்டமைப்பிற்கு இந்த நிதியை ஒதுக்கீடு செய்திட வேண்டும்.

மாறாக தனியார் பள்ளிகளில் கட்டாய கல்வி சட்ட திருத்தம் கொண்டுவந்து, தனியார் பள்ளி மாணவர்களுக்கு இலவச கல்வி அளிக்க சட்டம் கொண்டு வரவேண்டும்” எனக் குறிப்பிடப்பட்டிருந்தது.

இதையும் படிங்க:அரசு ஆசிரியர்கள் மீது தொடரப்பட்ட குற்றவியல் நடவடிக்கையை திரும்பப் பெற வலியுறுத்தி ஆர்ப்பாட்டம்!