தமிழ்நாட்டில், பள்ளிக் கல்வித் துறையில் காலியாக உள்ள முதுகலை ஆசிரியர்கள், உடற்கல்வி இயக்குனர் நிலை 1 ஆகியவற்றிற்கான விண்ணப்பங்கள் ஜூன் மாதம் 24ஆம் தேதி முதல் ஜூலை மாதம் 15ஆம் தேதி வரை ஆன்லைன் மூலம் பெறப்பட்டது. அதன்படி முதுகலை ஆசிரியர் பணி, உடற்கல்வி இயக்குனர் நிலை 1-ன் பணிக்கு சுமார் ஒரு லட்சத்து 80ஆயிரம் தேர்வர்கள் விண்ணப்பித்திருந்தனர்.
இந்நிலையில், ஆசிரியர் தேர்வு வாரிய தலைவர் வெளியிட்டுள்ள செய்தி குறிப்பில், 2018-19ஆம் ஆண்டிற்கான முதுகலை பட்டதாரி ஆசிரியர் உடற்கல்வி இயக்குனர் நிலை 1-ன் பணிக்கான கணினி வழி தேர்வு வரும் 27, 28, 29ஆம் தேதிகளில் நடைபெற உள்ளது. இந்த தேர்விற்கு உரிய அனுமதிச் சீட்டு ஆசிரியர் தேர்வு வாரியத்தின் இணைய தளமான www.trb.tn.nic.in என்ற முகவரியில் வெளியிடப்பட்டுள்ளது.
தேர்வர்கள் தேர்வுக்கூட நுழைவுச் சீட்டினை பிரின்ட் அவுட் எடுத்து தேர்வு மையத்திற்கு தெரிவிக்கப்பட்டுள்ள நேரம் மற்றும் அதில் தெரிவிக்கப்பட்டுள்ள ஏதேனும் ஒரு அசல் அடையாள அட்டையுடன், விண்ணப்பிக்கும்போது பதிவேற்றம் செய்த புகைப்படத்தில் அசல் பிரதியையும் தவறாமல் எடுத்து வர வேண்டும். தேர்வர்கள் தேர்வு நாளன்று காலையில் நடைபெறும் தேர்விற்கு காலை 7.30 மணிக்குள்ளும், மாலையில் நடைபெறும் தேர்விற்கு மதியம் 12.30 மணிக்குள்ளாகவும் தேர்வு மையத்திற்கு கண்டிப்பாக வருகை புரிய வேண்டும்.