பொதுத்தேர்வு விடைத்தாள் திருத்தும் பணியை ஒத்திவையுங்கள் - தமிழ்நாடு ஆசிரியர் முன்னேற்ற சங்கம்

சென்னை : 11, 12ஆம் வகுப்பு பொதுத்தேர்வு விடைத்தாள்கள் மதிப்பீட்டுப் பணியை ஜூலை மாதத்திற்கு ஒத்திவைக்க வேண்டும் என தமிழ்நாடு ஆசிரியர் முன்னேற்ற சங்கத்தின் மாநிலத் தலைவர் கோரிக்கை வைத்துள்ளார்.

கரோனா தொற்றுப் பரவல் கட்டுக்கடங்காமல் நாளுக்கு நாள் அதிகரித்து வரும் நிலையில், ஆசிரியர்கள், மாணவர்களின் நலன் கருதி 11, 12ஆம் வகுப்பு பொதுத்தேர்வு விடைத்தாள்கள் மதிப்பீட்டுப் பணியை தமிழ்நாடு அரசு ஒத்திவைக்க வேண்டும் என, அரசுக்கு தமிழ்நாடு ஆசிரியர் முன்னேற்ற சங்கத்தின் மாநிலத் தலைவர் தியாகராஜன் கோரிக்கை வைத்துள்ளார்.

இது குறித்து அவர் வெளியிட்டுள்ள அறிக்கையில், ”மத்திய இடைநிலைக் கல்வி வாரியம் (சிபிஎஸ்இ) நாடு முழுவதும் 10, 12ஆம் வகுப்புகளுக்கான தேர்வுகளை ஜூலை மாதம் நடத்தவுள்ளதாக கடந்த வாரம் அறிவிப்பு வெளியிட்டிருந்தது. தொடர்ந்து நீட் தேர்வு ஜூலை மாதத்தில் நடைபெற உள்ளதாக தேசியத் தேர்வு முகமையும் (NTA), கல்லூரிகளில் இளங்கலை பாடங்களுக்கான சேர்க்கையானது ஆகஸ்ட் மாதத்தில் தொடங்கவிருப்பதாக தமிழ்நாடு கல்லூரி கல்வி இயக்குநரகமும் அறிவித்துள்ளது.

தமிழ்நாட்டில் கரோனா நோய்த் தொற்று முழுமையாக இன்னும் நீங்கவில்லை. சென்னை, செங்கல்பட்டு, திருவள்ளூர், கடலூர் உள்ளிட்ட 12 மாவட்டங்களில் எவ்வித தளர்வுகளும் இன்றி பிற மாவட்டங்களில் பொதுப் போக்குவரத்து இல்லாத நிலையும் உள்ளது.

ஆயிரக்கணக்கான ஆசிரியர்கள் கரோனா தொற்றுப் பரவத் தொடங்கியதையடுத்து தங்கள் சொந்த ஊர்களுக்கு சென்றுள்ளனர். அவர்கள் அனைவரும் மீண்டும் தங்களின் பணியிடங்களுக்கு திரும்புவதில் நடைமுறைச் சிக்கல்கள் அதிகம் உள்ளன. 80 விழுக்காடு ஆசிரியர்கள், பெண் ஆசிரியர்கள் பாதுகாப்பற்ற சூழலில் இருசக்கர வாகனங்களில் வெகு தொலைவு பதற்றத்துடன் பயணிக்கும் நிலைக்கு தள்ளப்படுவார்கள்.

இந்நிலையில், போதிய கால அவகாசம் இருப்பதால் 11, 12ஆம் வகுப்பு பொதுத்தேர்வு விடைத்தாள்கள் மதிப்பீட்டுப் பணியில் அவசரம் காட்டாமல், ஜூலை மாதத்திற்கு ஒத்திவைக்க வேண்டும். விடைத்தாள்களை அமைதியான மனநிலை இல்லாமல் மன இறுக்கத்துடன் மதிப்பீடு செய்வது உகந்ததாக இருக்காது.

மேலும், மார்ச் 26ஆம் தேதி நடைபெறாத 11ஆம் வகுப்புக்கான விடுப்பட்ட பாடத்திற்கான தேர்வு, வருகிற ஜூன் 16ஆம் தேதி நடைபெறவுள்ளது. மார்ச் 24ஆம் தேதி நடைபெற்ற 12ஆம் வகுப்பு வேதியியல் பாடத் தேர்விற்கு பேருந்து கிடைக்காததால் பங்கேற்க இயலாமல், தேர்வெழுத முடியாமல் போன 36 ஆயிரத்து 842 மாணவர்களுக்கு ஜூன் 18ஆம் தேதி மறு தேர்வு நடைபெறவுள்ளது.

இந்நிலையில், இந்தத் தேர்வுகளும் முடிந்து, இவ்விடைத்தாள்களும் மதிப்பீடு செய்யப்பட்டால்தான் தேர்வு முடிவுகள் முழுமை பெறும். ஆகவே மாணவர் நலனையும், ஆசிரியர் நலனையும் கருத்தில் கொண்டு கரோனா நோய்த் தொற்றுப் பரவல் கட்டுக்குள் வந்து, பொதுப் போக்குவரத்து சகஜ நிலைக்கு திரும்பிய பிறகு விடைத்தாள்கள் மதிப்பீட்டு பணியைத் தொடர அனுமதிக்க வேண்டும்.

மேலும், பணிகளைத் தொடங்கும்போது பணி இடத்திலிருந்து சொந்த மாவட்டத்திற்கு சென்றுள்ள ஆசிரியர்களின் நலன் கருதி, அவர்களது மாவட்டங்களிலேயே எளிதில் அணுகக் கூடிய விடைத்தாள் மதிப்பீட்டு மையங்களில் பணி மேற்கொள்ள அனுமதி வழங்க வேண்டும்”. இவ்வாறு அந்த அறிக்கையில் தெரிவிக்கப்பட்டுள்ளது.

இதையும் படிங்க :போட்டித் தேர்வுகளுக்குத் தயாராகும் மாணவர்களுக்கு மத்திய அரசின் புதிய செயலி...!