சென்னை:எழும்பூரில் உள்ள தமிழ்நாடு மருத்துவப் பணிகள் கழகத்தில், சென்னை ராஜிவ் காந்தி அரசு மருத்துவமனை, எழும்பூர் குழந்தைகள் நல மருத்துவமனை, ஸ்டான்லி அரசு மருத்துவமனை, கோயம்புத்தூர் அரசு மருத்துவமனை, மதுரை அரசு மருத்துவமனை என ஐந்து அரசு மருத்துவமனைகளுக்கும் சென்னை ரேலா மருத்துவமனைக்கும் இடையே கல்லீரல் மாற்று அறுவை சிகிச்சை மற்றும் எலும்பு மஜ்ஜை மாற்று சிகிச்சைக்கான புரிந்துணர்வு ஒப்பந்தம், மருத்துவம் மற்றும் மக்கள் நல்வாழ்வுத்துறை அமைச்சர் மா. சுப்பிரமணியன் முன்னிலையில் கையெழுத்தானது.
இந்நிகழ்வில் பேசிய அமைச்சர் மா. சுப்பிரமணியன், "இந்த ஒப்பந்தத்தின்படி ரேலா மருத்துவர்கள் குழு அரசு மருத்துவமனைக்குச்சென்று, மாற்று அறுவை சிகிச்சையை செய்வார்கள். இந்த அறுவை சிகிச்சையின்போது அரசு மருத்துவர்கள் உடனிருந்து பயிற்சி பெற்றுக்கொள்வர். எழும்பூர் குழந்தைகள் நல மருத்துவமனையின் நோயாளிகள் மட்டும் ரேலா மருத்துவமனைக்குச் சென்று சிகிச்சை பெறுவார்கள்.
முதலமைச்சரின் விரிவான காப்பீட்டுத் திட்டம்
முதலமைச்சரின் விரிவான காப்பீட்டுத் திட்டத்தின்கீழ், கல்லீரல் மாற்று அறுவை சிகிச்சைக்கு ரூ.19 லட்சமும், எலும்பு மஜ்ஜை மாற்று அறுவை சிகிச்சைக்கு ரூ.3 லட்சமும் செலவிடப்படுகிறது. அரசு மருத்துவமனைகளில் ஸ்டான்லி மருத்துவமனையில் 2009ஆம் ஆண்டு முதல் கல்லீரல் மாற்று அறுவை சிகிச்சை செய்யப்படுகிறது. இதுவரை முதலமைச்சர் காப்பீட்டுத் திட்டத்தின்கீழ் 1043 நோயாளிகளுக்கு கல்லீரல் மாற்று அறுவை சிகிச்சை ரூ.225 கோடியில் செய்யப்பட்டுள்ளது.
தலசிமியா, ரத்தப் புற்றுநோய், ரத்த சோகை ஆகிய நோய்களால் பாதிக்கப்பட்ட நோயாளிகளுக்கு இதுவரை 1493 பேருக்கு எலும்பு மஜ்ஜை மாற்று அறுவை சிகிச்சை ரூ.149 கோடியில் செய்யப்பட்டுள்ளது. தமிழ்நாட்டில் தற்போது 314 பேர் கல்லீரல் மாற்று அறுவை சிகிச்சைக்காக காத்திருக்கின்றனர்" எனத் தெரிவித்தார்.