நீட் தேர்வு: தமிழ்நாடு அரசுப் பள்ளி மாணவர்கள் தேர்ச்சி விகிதம் உயர்வு!

தமிழ்நாட்டில் அரசுப் பள்ளிகளில் படித்து நீட் தேர்வு எழுதி தேர்ச்சியடைந்தவர்களின் எண்ணிக்கை 2 ஆயிரத்து 675 ஆக அதிகரித்துள்ளது.

சென்னை: தமிழ்நாட்டில் இளநிலை மருத்துவப் படிப்பில் மாணவர்கள் சேர்வதற்கான நீட் தேர்வுக்கு அரசு எதிர்ப்பு தெரிவித்து வருகிறது. இருப்பினும் அரசுப் பள்ளி மாணவர்களின் நலனைக் கருத்தில் கொண்டு நீட் தேர்விற்கு ஆன்லைன் மூலம் பயிற்சி அளிக்கப்பட்டது.

ஏற்கனவே தமிழ்நாட்டில் மாநிலப் பாடத்திட்டத்தில் பயிலும் மாணவர்களுக்கான பாடத்திட்டமும் மாற்றி அமைக்கப்பட்டது. புதியதாக மாற்றி அமைக்கப்பட்ட பாடத்திட்டத்தில் படித்த மாணவர்கள் நீட் தேர்வினை எழுதினர்.

நீட் தேர்வு

7.5 விழுக்காடு இட ஒதுக்கீடு

தமிழ்நாடு பாடத்திட்டத்தில் இருந்து நீட் தேர்வில் அதிகளவிலான கேள்விகள் இடம் பெற்றிருந்தன. 2018 - 19 ஆம் கல்வியாண்டில் 14 ஆயிரத்து 929 மாணவர்கள் நீட் தேர்வு எழுதினர். இதில் அரசு மற்றும் அரசு உதவி பெறும் பள்ளிகளைச் சேர்ந்த 2 ஆயிரத்து 583 மாணவர்கள் தகுதி பெற்றனர்.

இருப்பினும் தேர்ச்சியடைந்தவர்களில் ஒரு மாணவர் மட்டுமே மருத்துவப் படிப்பில் சேர்ந்தார். இதே போன்று 2019 - 20 ஆம் கல்வியாண்டில் 6 ஆயிரத்து 692 மாணவர்கள் நீட் தேர்வு எழுதினர். இதில் அரசு மற்றும் அரசு உதவி பெறும் பள்ளிகளைச் சேர்ந்த ஆயிரத்து 633 மாணவர்கள் தேர்ச்சியடைந்தனர்.

பின்னர் அரசுப் பள்ளி மாணவர்களுக்கு இளநிலை மருத்துவப் படிப்பில் 7.5 சதவீதம் முன்னுரிமை அடிப்படையில் இட ஒதுக்கீடு அளிக்கப்பட்டதால், 435 மாணவர்கள் மருத்துவப் படிப்பில் சேர்ந்தனர்.

கடந்த ஆண்டு 2,675 பேர் தேர்ச்சி

இந்நிலையில் 2020 - 21ஆம் கல்வியாண்டில் அரசு மற்றும் அரசு உதவி பெறும் பள்ளியைச் சேர்ந்த 10 ஆயிரத்து 853 பேர் தேர்ழுதினர். தற்போது இதில் அரசுப் பள்ளியைச் சேர்ந்த ஆயிரத்து 709 பேர், அரசு உதவி பெறும் பள்ளியைச் சேர்ந்த 966 பேர் என மொத்தம் 2 ஆயிரத்து 675 மாணவர்கள் தேர்ச்சியடைந்துள்ளனர்.

நீட் தேர்வு

தமிழ்நாட்டில் இளநிலை எம்பிபிஎஸ் மருத்துவப் படிப்புக்காக செயல்படும் 25 அரசு மருத்துவக் கல்லூரிகளில் 3 ஆயிரத்து 450 இடங்கள் உள்ளன. தற்போது புதிதாக ஆரம்பிக்கப்பட்ட 11 மருத்துவக் கல்லூரிகளில் ஆயிரத்து 450 இடங்கள் உள்ளன.

இது தவிர ஏற்கனவே செயல்படும் 17 சுயநிதி மருத்துவக் கல்லூரிகளில் 2 ஆயிரத்து 475 இடங்கள், புதிய 4 மருத்துவக் கல்லூரிகளில் 600 இடங்களும் உள்ளன.

700 மருத்துவக் கல்லூரி இடங்கள் கிடைக்க வாய்ப்பு

அனைத்து அரசு மற்றும் சுயநிதி மருத்துவக் கல்லூரிகளையும் சேர்த்து மொத்தமாக 7 ஆயிரத்து 975 இடங்கள் உள்ளன. மொத்த இடங்களில் அரசுப் பள்ளி மாணவர்களுக்கான 7.5 சதவீத இடஒதுக்கீட்டின் அடிப்படையில், சுமார் 700 மாணவர்களுக்கு இடம் கிடைக்க வாய்ப்புள்ளது.

அதேபோல் பல்மருத்துவப் படிப்பில் 2 அரசு மருத்துவக்கல்லூரியில் உள்ள 194 இடங்களில் 15 இடங்கள் கிடைக்கும். மேலும் 17 சுயநிதி பல் மருத்துவக்கல்லூரிகளில் உள்ள 1760 இடங்களில், 84 இடங்களும் கிடைக்கும்.

மொத்தமாக பல்மருத்துவக் கல்லூரிகளில் 99 இடங்கள் கிடைக்க் வாய்ப்புள்ளது. நடப்பு ஆண்டில் செப்டம்பர் 12ஆம் தேதி நீட் தேர்வானது நாடு முழுவதும் நடைபெற்றது.

இதில் 15 லட்சத்திற்கும் அதிகமான மாணவர்கள் பங்கேற்றனர். தமிழ்நாட்டில் மட்டும் ஒரு லட்சத்திற்கும் அதிகமான மாணவர்கள் பங்கேற்ற நீட் தேர்வின் முடிவுகள் நவம்பர் 1ஆம் தேதி வெளியாகின என்பது குறிப்பிடத்தக்கது.

இதையும் படிங்க:காட்பாடியில் பொதுப்பணித் துறையின் புதிய அலுவலகக் கட்டடம்: ஸ்டாலின் திறந்துவைப்பு