தமிழ்நாடு சட்டப்பேரவையில் மார்ச் 20ஆம் தேதி பட்ஜெட் தாக்கல் - சபாநாயகர் அப்பாவு

2023 - 24ஆம் ஆண்டுக்கான நிதிநிலை அறிக்கையை நிதி அமைச்சர் பி.டி.ஆர். பழனிவேல் தியாகராஜன் மார்ச் 20ஆம் தேதி சட்டப்பேரவையில் தாக்கல் செய்கிறார் என சபாநாயகர் அப்பாவு தெரிவித்தார்.

சென்னை: 2023-24ஆம் ஆண்டுக்கான நிதி நிலை அறிக்கை தொடர்பாக சென்னை தலைமைச் செயலகத்தில் சபாநாயகர் அப்பாவு செய்தியாளர்களைச் சந்தித்தார். அப்போது பேசிய அவர், "2023 - 24ஆம் ஆண்டுக்கான நிதிநிலை அறிக்கை மார்ச் 20ஆம் தேதி தமிழ்நாடு சட்டப்பேரவையில், காலை 10 மணிக்கு அமைச்சர் பி.டி.ஆர் பழனிவேல் தியாகராஜன் தாக்கல் செய்கிறார்.

தொடர்ந்து அன்று பிற்பகல் சட்டப்பேரவையில் அலுவல் ஆய்வுக்குழு கூட்டம் கூட்டப்பட்டு, நிதிநிலை அறிக்கை கூட்டத்தை எத்தனை நாட்கள் நடத்துவது என்பது குறித்து முடிவு செய்யப்பட இருக்கிறது'' என்றார்.

தமிழ்நாடு சட்டப்பேரவையில் யாரை எங்கு உட்கார வைப்பது என்பது என்னுடைய முடிவு என சபாநாயகர் அப்பாவு ஏற்கனவே கூறியிருந்தார். இன்று ஓ.பன்னீர்செல்வம், எடப்பாடி பழனிசாமி இருக்கை சர்ச்சை தொடர்பான கேள்விக்கு, ''எதிர்க்கட்சி துணைத் தலைவர் இருக்கை விவகாரத்தில் ஏற்கனவே பேசி தீர்வு காணப்பட்டது. தற்போது அதில் எந்த வித குழப்பமும் இல்லை'' எனத் தெரிவித்தார்.

தொடர்ந்து நிதி அமைச்சர் மார்ச் 28ஆம் தேதி முன்பண மானிய கோரிக்கை மற்றும் கூடுதல் செலவினங்களுக்கான நிதிநிலை அறிக்கையை தாக்கல் செய்ய இருப்பதாகவும் தெரிவித்தார். வேளாண் நிதிநிலை அறிக்கை, மானிய கோரிக்கையின் மீதான விவாதம் உள்ளிட்டவை அலுவலக கூட்டத்திலே முடிவு செய்யப்படும் எனவும் தெரிவித்தார்.

ஆளுநர் உரையின்பது பேரவை மாடத்தில் அமர்ந்து செல்போன் வாயிலாக வீடியோ எடுத்த விவகாரம் குறித்து உரிமைக் குழு முடிவெடுக்கும் என்றும்; எதிர்க்கட்சி துணைத் தலைவர் விவகாரம் நாட்டிற்கு முக்கியமானது அல்ல எனவும்; ஏற்கனவே முடிந்த விவகாரம், அவர்கள் சட்டப்பேரவையில் மக்கள் பிரச்னையை மட்டும் பேசிவிட்டுச் செல்வார்கள் என்றார்.

இதையும் படிங்க: வினாத்தாள் அச்சடிக்கும் இடத்தில் ஏற்பட்ட தவறே குரூப் 2 தேர்வு குளறுபடிக்கு காரணம்!