காலால் எட்டி உதைத்த உதவி ஆய்வாளர் பணியிடை நீக்கம்!

முகக்கவசம் அணியாததற்காக இறைச்சிக் கடை ஊழியரை காலால் எட்டி உதைத்த சிசிடிவி காட்சி வைரலானதை அடுத்து, உதவி ஆய்வாளர் ஒருவர் இன்று பணியிடை நீக்கம் செய்யப்பட்டார்.

சென்னை:பெரும்பாக்கம் நேதாஜி நகரில் செயல்பட்டு வரும் இறைச்சி கடை ஒன்றில் வேலை பார்த்து வருபவர் சபீர் (18). இவர் நேற்று முன்தினம் (ஆக.12) மாலை 6 மணியளவில், வழக்கம்போல் கடையில் வேலை பார்த்துக் கொண்டிருந்தார்.

அப்போது பெரும்பாக்கம் காவல் நிலைய உதவி ஆய்வாளர் ஜான் போஸ்கோ அங்கு வந்திருக்கிறார். பின்னர் சபீர் முகக்கவசம் அணியவில்லை எனக் கூறி, அவரை எட்டி உதைத்து தாக்கியுள்ளார். இது தொடர்பான சிசிடிவி காட்சிகள் இணையத்தில் வெளியாகி பரபரப்பை ஏற்படுத்தின.

இந்நிலையில் ஊழியரைத் தாக்கிய காவல் அலுவலர் மீது நடவடிக்கை எடுக்கக்கோரி, வியாபாரிகள் போராட்டத்தில் ஈடுபட்டனர்.

பின்னர் சம்பவ இடத்துக்கு விரைந்து வந்த காவலர்கள், வியாபாரிகளுடன் பேச்சுவார்த்தை நடத்தி கலைந்து செல்லச் செய்தனர். தற்போது இதன் காரணமாக உதவி ஆய்வாளர் ஜான் போஸ்கோ, இன்று (ஆக.14) பணியிடை நீக்கம் செய்யப்பட்டுள்ளார்.

இதையும் படிங்க:ட்விட்டரில் மீண்டு(ம்) வந்த ராகுல் காந்தியின் கணக்கு!