Result: 10, 11ஆம் வகுப்பு பொதுத்தேர்வு முடிவுகள் நாளை வெளியாகிறது!

10 மற்றும் 11ஆம் வகுப்பு பொதுத்தேர்வு முடிவுகள், நாளை (மே 19) www.tnresults.nic.in, www.dge.tn.gov.in என்ற இணையதளத்தில் வெளியிடப்படுகிறது.

சென்னை:தமிழ்நாடு மாநிலப் பாடத் திட்டத்தில் 11ஆம் வகுப்பு படித்த மாணவர்களுக்கு 2022 - 2023ஆம் கல்வியாண்டிற்கான பொதுத் தேர்வு, கடந்த மார்ச் 14ஆம் தேதி தொடங்கி ஏப்ரல் 5 வரை நடைபெற்றது. பள்ளிகளில் படித்த தமிழ்நாடு மற்றும் புதுச்சேரியில் இருந்து 7 லட்சத்து 88 ஆயிரத்து 64 பேர் தேர்வெழுத விண்ணப்பித்தனர்.

இவர்களில் தமிழ்நாட்டுப் பள்ளிகளில் இருந்து 3 லட்சத்து 60 ஆயிரத்து 908 மாணவர்கள், 4 லட்சத்து 12 ஆயிரத்து 779 மாணவிகள் மற்றும் மூன்றாம் பாலினத்தவர் ஒருவர் என மொத்தம் 7 லட்சத்து 73 ஆயிரத்து 688 பேர் தேர்வினை எழுத அனுமதிக்கப்பட்டனர். இந்த தேர்வினை தமிழ்நாட்டில் 3 ஆயிரத்து 224 மையங்களில் மாணவர்கள் எழுதினர்.

அதேநேரம், புதுச்சேரி பள்ளிகளில் படித்த 6 ஆயிரத்து 799 மாணவர்கள், 7 ஆயிரத்து 577 மாணவிகள் என 14 ஆயிரத்து 376 பேர் 40 தேர்வு மையங்களில் தேர்வினை எழுதினர். தனித் தேர்வர்களாக 2 ஆயிரத்து 356 மாணவர்களும், 2 ஆயிரத்து 979 மாணவிகளும் மற்றும் 3 மூன்றாம் பாலினத்தவர்களும் என 5 ஆயிரத்து 338 பேர் 135 மையங்களில் தேர்வு எழுதினர்.

அதேபோல், தமிழ்நாடு மாநிலப் பாடத் திட்டத்தில் 10ஆம் வகுப்பு படிக்கும் மாணவர்கள் 2022 - 2023ஆம் கல்வியாண்டிற்கான பொதுத் தேர்வு கடந்த ஏப்ரல் 6ஆம் தேதி தொடங்கி, ஏப்ரல் 20 வரை நடைபெற்றது. தமிழ்நாடு மற்றும் புதுச்சேரியில் இருந்து 9 லட்சத்து 38 ஆயிரத்து 291 பள்ளிகளில் படிக்கும் மாணவர்கள் தேர்வெழுத அனுமதிக்கப்பட்டனர்.

தமிழ்நாட்டில் உள்ள 12 ஆயிரத்து 352 பள்ளிகளில் படித்த 4 லட்சத்து 66 ஆயிரத்து 765 மாணவர்கள், 4 லட்சத்து 55 ஆயிரத்து 960 மாணவிகள் தமிழ்நாட்டில் உள்ள 3 ஆயிரத்து 976 மையங்களில் தேர்வினை எழுதினர். புதுச்சேரியில் உள்ள 287 பள்ளிகளில் படித்த 7 ஆயிரத்து 911 மாணவர்கள், 7 ஆயிரத்து 655 மாணவிகள் என 15 ஆயிரத்து 566 பேர் 49 தேர்வு மையங்களில் எழுதினர்.

தனித்தேர்வர்களாக 26 ஆயிரத்து 352 மாணவர்களும், 14 ஆயிரத்து 441 மாணவிகளும் மற்றும் 5 மூன்றாம் பாலினத்தவர்களும் என 37 ஆயிரத்து 798 பேர் 182 மையங்களில் எழுதினர். இவ்வாறு நடைபெற்ற தேர்வுகளின் விடைத்தாள் திருத்தும் பணிகள் முடிவடைந்து, தேர்வு முடிவுகள் தயார் நிலையில் உள்ளது.

இந்த நிலையில், அரசுத் தேர்வுத்துறை இயக்குனர் சேதுராமவர்மா கூறுகையில், “2022 - 2023ஆம் கல்வி ஆண்டில் 10 மற்றும் 11ஆம் வகுப்பு பொதுத் தேர்வு முடிவுகள் நாளை (மே 19) அரசுத்தேர்வுத்துறை இயக்குநர் அலுவலகத்தில் வெளியிடப்படுகிறது.

10ஆம் வகுப்பு மாணவர்களுக்கான தேர்வு முடிவுகள் நாளை காலை 10 மணிக்கும், 11ஆம் வகுப்பு தேர்வு முடிவுகள் அதே நாளில் மதியம் 2 மணிக்கும் www.tnresults.nic.in, www.dge.tn.gov.in என்ற இணையதளத்தில் வெளியிடப்பட உள்ளது. அரசுத் தேர்வுத் துறையின் இணையதளத்தில், மாணவர்கள் தங்களின் பதிவு எண் மற்றும் பிறந்த தேதி ஆகியவற்றைப் பதிவு செய்து தேர்வு முடிவுகளை அறிந்து கொள்ளலாம்.

மேலும், ஒவ்வொரு மாவட்டத்திலும் மாவட்ட ஆட்சியர் அலுவலகத்தில் இயங்கும் தேசிய தகவலியல் மையங்களிலும் அனைத்து மைய மற்றும் கிளை நூலகங்களிலும் கட்டணம் இன்றி தேர்வு முடிவுகளை அறிந்து கொள்ளலாம். பள்ளி மாணவர்கள் தாங்கள் பயின்ற பள்ளிகளிலும், மதிபெண்கள் உடன் கூடிய தேர்வு முடிவுகளை அறிந்து கொள்ளலாம்.

பள்ளி மாணவர்களுக்கு அவர்கள் பயின்ற பள்ளிகளில் சமர்பித்த செல்போன் எண்ணிற்கும், தனித்தேர்வர்கள் ஆன்லைனில் விண்ணப்பிக்கும்போது வழங்கிய செல்போன் எண்ணிற்கும் எஸ்எம்எஸ் மூலம் முடிவுகள் அனுப்பப்படும்” எனத் தெரிவித்துள்ளார்.

இதையும் படிங்க:+2 பொதுத்தேர்வில் தோல்வியடைந்த மாணவர்களுக்கு மனநல ஆலோசனை!