இதுகுறித்து திமுக தலைவர் மு.க. ஸ்டாலின் எழுதியுள்ள கடிதத்தில், ‘மக்களின் நம்பிக்கைக்குரிய பேரியக்கம் எந்நாளும் திமுக என்பதை மீண்டும் ஒரு முறை மெய்ப்பித்துள்ளது. ஊரக உள்ளாட்சித் தேர்தல் முடிவுகள், ஊரக உள்ளாட்சித் தேர்தலில் திமுக தலைமையிலான கூட்டணிக்கு மகத்தான வெற்றியை அளித்த தமிழ்நாடு மக்களுக்கு மனமார்ந்த நன்றியினையும், வணக்கத்தையும் தெரிவித்துக் கொள்கிறேன். அதிகார போதையில், வெற்றி பெற்றுவிடலாம் என பகல் கனவு கண்டுக்கொண்டிருந்த ஆளுந்தரப்புக்கு மக்கள் சம்மட்டி அடி கொடுத்துள்ளனர்.
தேர்தல் நடைபெற்ற 27 மாவட்டங்களில் 14 மாவட்டங்களில் திமுக கூட்டணியே வெற்றி பெற்றிருக்கிறது. எஞ்சிய 13 மாவட்டங்கள் பலவற்றிலும் திமுக கூட்டணியின் வெற்றி குறிப்பிடத்தக்க அளவில் உள்ளது. அறிவிக்கப்பட்ட முடிவுகளுடன், அநீதியாக எடுக்கப்பட்ட முடிவுகளிலும் நீதிமன்றத்தின் வாயிலாக நியாயம் கிடைக்குமென்றால், சேலம், கரூர் உள்ளிட்ட மேலும் பல மாவட்டங்களிலும் ஒன்றியங்களிலும் திமுக கூட்டணியின் வெற்றி எண்ணிக்கை மேலும் அதிகரிக்கும் என்பது உறுதி.
சேலத்தில் ஒன்றிய கவுன்சிலர் பதவிக்கு திமுக வேட்பாளரான 22 வயது பட்டதாரி பெண் பிரீத்தி மோகன், திருச்செங்கோடு ஒன்றிய உறுப்பினர் தேர்தலில் போட்டியிட்ட ரியா என்ற திருநங்கை, திருப்பூர் மாவட்டத்தில் 82 வயது மூதாட்டியும், மேலூரில் 79 வயது மூதாட்டியும், தோவாளையில் 73 வயது மூதாட்டியும், கிருஷ்ணகிரியில் 21 வயது கல்லூரி மாணவியும், போன்ற மக்கள் பிரதிநிதிகளான எளிய மக்களுக்கும் என் நல்வாழ்த்துகளைத் தெரிவித்துக் கொள்கிறேன்.