சென்னை:திமுக மகளிரணி சார்பில் இன்று நடைபெறும் மகளிர் உரிமை மாநாட்டில் பங்கேற்க காங்கிரஸ் மூத்த தலைவர் சோனியா காந்தி, பிரியங்கா காந்தி உள்ளிட்ட இந்தியா கூட்டணி கட்சிகளின் தலைவர்கள் சென்னை வந்தனர். அவர்களை முதலமைச்சர் மு.க.ஸ்டாலின் உள்பட அமைச்சர்கள், நாடாளுமன்ற உறுப்பினர்கள் வரவேற்றனர்.
இதனைத் தொடர்ந்து இன்று (அக்.14) காலை முதலே சோனியா காந்தி மற்றும் பிரியங்கா காந்தி ஆகிய இருவரும், தமிழகத்தில் உள்ள காங்கிரஸ் நிர்வாகிகள், சட்டப்பேரவை உறுப்பினர்கள், நாடாளுமன்ற உறுப்பினர்களைச் சந்தித்து தொடர்ந்து முக்கிய முடிவுகளை குறித்து ஆலோசிக்கபட்டு வருவதாக தகவல்கள் வெளியாகி உள்ளன.
முக்கிய ஆலோசனை: கிண்டியில் உள்ள நட்சத்திர ஓட்டலில் தங்கியுள்ள சோனியா காந்தி மற்றும் பிரியங்கா காந்தி, தமிழக காங்கிரஸ் கட்சியின் இன்று முக்கிய நிர்வாகிகளைச் சந்தித்தனர். இந்த நிலையில் 5 ஆண்டுகள் கழித்து சோனியா காந்தி சென்னை வந்துள்ள நிலையில், தற்போது தமிழக காங்கிரஸ் கட்சியின் நிர்வாகிகளுடன் ஆலோசனை நடத்தி வருகிறார்.