சென்னை :இந்திய சினிமாவின் முன்னோடியாக இருந்த நடிகர் திலகம் சிவாஜி கணேசனின் 22வது நினைவு தினம் இன்று. இதனையொட்டி தென்னிந்திய நடிகர் சங்க அலுவலகத்தில் வைக்கப்பட்டு இருந்த படத்திற்கு சங்கத் தலைவர் நாசர் மலர் தூவி வணங்கி மரியாதை செய்தார்.
பின்னர் பேசிய நாசர் , "நான் நடிக்கின்ற நொடிப்பொழுதும் நினைவிற்கு வருகின்ற என் ஆசான். என் சமூகத்தில் தோன்றி வண்டமிழ் பேசி காலத்தால் கரையாத காவியங்கள் படைத்திட்ட என் பெருமகனார். சிவாஜிகணேசன் ஐயா நினைவேந்தல் இன்று தென்னிந்திய நடிகர் சங்கமும் வையமும் உம்மை போற்றுதும்.. போற்றுதும்.. போற்றுதும்" என்று தெரிவித்துள்ளார். முன்னதாக சிவாஜி மணிமண்டபத்தில் அவரது மகன் நடிகர் ராம்குமார் அஞ்சலி செலுத்தினார்.
அமேசான் பிரைமில் தொடர்ந்து முதலிடத்தில் தண்டட்டி:பிரின்ஸ் பிக்சர்ஸ் தயாரிப்பில் தயாரான தண்டட்டி கடந்த ஜூன் 23ல் திரையரங்கில் வெளியாகியது. பின் ஜூலை 14-ஆம் தேதி அமேசான் பிரைமில் வெளியிடப்பட்டது. கிராமத்து வாழ்வியலை, தண்டட்டி என்ற அப்பத்தாக்கள் அணிந்திருக்கும் நகையை வைத்து அழகுறச் சொல்லியிருந்த இப்படம் வெகு வரவேற்பை பெற்று வருகிறது.
மேலும் வெளியிட்ட நாள் முதல் இன்று வரை அமேசான் பிரைமில் தண்டட்டி முதலிடத்தில் இருக்கிறது. இயக்குநர் ராம் சங்கையா இயக்கிய இப்படத்தில் பசுபதி, ரோகினி, அம்மு அபிராமி, விவேக் பிரசன்னா உள்ளிட்ட பலர் நடித்துள்ளனர். இயல்பான திரைக்கதை படம் பார்த்த ரசிகர்களை கவர்ந்துள்ளது.
விறுவிறுப்பான ராபரி திரில்லர் 'லாக்கர்':இரட்டை இயக்குனர்கள் ராஜசேகர் என் மற்றும் யுவராஜ் கண்ணன் இயக்கியுள்ள படம் 'லாக்கர்'. இப்படத்தை நாராயணன் செல்வம் புரொடக்சன்ஸ் தயாரித்திருக்கிறது. இதில் விக்னேஷ் சண்முகம், நிரஞ்சனி அசோகன் நடித்துள்ளனர்.வில்லனாக நிவாஸ் ஆதித்தன் நடித்துள்ளார். முழுக்க முழுக்க சென்னை, அதைச் சுற்றியுள்ள பகுதிகளில் படப்பிடிப்பு நடைபெற்றுள்ளது. கிழக்கு கடற்கரைச் சாலை, அம்பத்தூர், குரோம்பேட்டை போன்ற இடங்களில் 30 நாட்கள் படப்பிடிப்பு நடைபெற்றுள்ளது. படப்பிடிப்பு முடிந்து இறுதி கட்டப் பணியில் இருக்கும் லாக்கர் ஒரு ராபரி டிராமாவாக உருவாகியுள்ளது. விரைவில் திரைக்கு வர உள்ளது.
25வது நாளை கடந்த அஸ்வின்ஸ்:தரமணி, ராக்கி உள்ளிட்ட படங்களின் மூலம் பிரபலமடைந்த நடிகர் வசந்த் ரவி நடிப்பில் கடந்த மாதம் வெளிவந்த ஹாரர் படமான 'அஸ்வின்ஸ்' தற்போது 25வது நாளை கடந்துள்ளது. இதற்கு வசந்த் ரவி நன்றி தெரிவித்துள்ளார். எனது அன்புக்குரிய சகோதர சகோதரிகளுக்கு வணக்கம், என் இதாத்தில் உள்ள அளப்பரிய மகிழ்ச்சியை நன்றி உணர்வுடன் உங்களிடம் பகிர்ந்து கொள்வதில் பெருமை அடைகிறேன். தமிழ் திரையில் நடிக்க வேண்டும் என்ற ஆர்வம் காரணமாக வந்த என்னை மிகப் பெரிய அங்கீகாரமும் ,ஆதரவும் ,தந்த நீங்கள் தான் இனி என் உலகம் எண்ணற்ற கலைஞர்களுக்கு நீங்கள்தான் அடித்தளமாக இருந்து அவர்களை ரசித்து மிகப்பெரிய உயரத்துக்கு கொண்டு சென்றீர்கள் அவ்வழியில் உங்கள் அனைவரின் அன்பைப் பெற்றதற்காக நான் உண்மையிலேயே பாக்கியவானாக உங்கள் முன்பு இருக்கின்றன அதற்கு நன்றிகள் என்று தெரிவித்துள்ளார்.
இதையும் படிங்க :திரைச் சிதறல்: இந்த வார ரிலீஸ் படங்கள் என்னென்ன?
