'சத்தியமங்கலம் நகராட்சியில் மாற்று இடத்தில் கழிவுநீர் சுத்திகரிப்பு நிலையம் அமைக்கக் கூடாது' - sewage treatment plant
சென்னை: சத்தியமங்கலம் நகராட்சியில் தேர்வுசெய்யப்பட்ட இடத்தை விடுத்து, மாற்று இடத்தில் கழிவுநீர் சுத்திகரிப்பு நிலையம் அமைப்பதற்கான பணிகளை மேற்கொள்ளக் கூடாது என உயர் நீதிமன்றம் உத்தரவிட்டுள்ளது.
ஈரோடு சத்தியமங்கலத்தில் தேர்வுசெய்யப்பட்ட இடத்தை விடுத்து, மாற்று இடத்தில் கழிவுநீர் சுத்திகரிப்பு நிலையம் அமைப்பதற்கான பணிகளை மேற்கொள்ளக் கூடாது என சென்னை உயர் நீதிமன்றம் உத்தரவிட்டுள்ளது.
சத்தியமங்கலம் நகராட்சியில் கோட்டு வீராம்பாளையத்தில் கழிவுநீர் சுத்திகரிப்பு நிலையம் அமைக்கப்பட்டுள்ள நிலையில், இரண்டாவது நிலையத்தை ஆர்.எம்.பி. நகரில் அமைக்க நகராட்சி திட்டமிட்டது. திட்டமிட்ட திட்டப்பணிகள் தொடங்கவிருந்த நிலையில், திடீரென ஆர்.எம்.பி. நகரிலிருந்து, ரங்கசமுத்திரத்துக்கு மாற்ற நகராட்சி முடிவுசெய்துள்ளதாகக் கூறி, அதை எதிர்த்து சத்தியமங்கலத்தைச் சேர்ந்த எஸ்.கே. ராதாகிருஷ்ணன் சென்னை உயர் நீதிமன்றத்தில் வழக்குத் தொடர்ந்தார்.
ஆர்.எம்.பி. நகரில் கழிவுநீர் சுத்திகரிப்பு நிலையம் அமைக்கப்படுவதை எதிர்த்துத் தொடரப்பட்ட வழக்கில், இடத்தை மாற்ற முடியாது என சத்தியமங்கலம் நகராட்சி திட்டவட்டமாகக் கூறியதால், வழக்குகள் தள்ளுபடி செய்யப்பட்டதாகவும், தற்போது ரங்கசமுத்திரம் என்ற இடத்திற்கு நகராட்சியே திட்டத்தை மாற்றம் செய்துள்ளதாகவும் மனுவில் குற்றஞ்சாட்டியுள்ளார்.