சென்னை தரமணியில் உள்ள எம்.எஸ். சுவாமிநாதன் ஆராய்ச்சி மற்றும் பவுண்டேசன் நிறுவனத்தின் 32ஆவது ஆண்டு விழாவையொட்டி கோவிட்-19 காலத்தில் உணவுப் பாதுகாப்பை உறுதிசெய்தல் குறித்த கருத்தரங்கு இன்று (ஆகஸ்ட் 6) நடைபெற்றது. விழாவிற்கு தமிழ்நாடு முதலமைச்சர் மு.க. ஸ்டாலின் தலைமை தாங்கி நான்கு நாள்கள் கருத்தரங்கைத் தொடங்கிவைத்தார்.
மேடையில் பேசிய முதலமைச்சர் மு.க. ஸ்டாலின், "கடந்த 32 ஆண்டுகளாகப் பயணித்துக் கொண்டிருக்கும் இந்த ஆராய்ச்சி நிறுவனம் நாட்டு மக்களுக்கு மட்டுமின்றி உலக அளவில் சிறந்த பெயர் பெற்று விளங்குகிறது. அந்த நிறுவன நிகழ்ச்சியில் பங்கேற்பது மிகவும் பெருமையாக இருக்கிறது.
நிதிநிலை அறிக்கையில் உழவர்களின் வருவாயை உயர்த்தும் அம்சம்
சுற்றுச்சூழல் பாதுகாப்பு பருவநிலை மாறுபாடு உள்ளிட்ட பல்வேறு காரணங்களைக் கருத்தில்கொண்டு வருகிற 13ஆம் தேதி காகிதம் இல்லாத நிதிநிலை அறிக்கை தமிழ்நாடு சட்டப்பேரவையில் தாக்கல்செய்யப்பட இருக்கிறது. மேலும் வேளாண்மைக்கு முக்கியத்துவம் அளிக்கும் வகையில் உழவர்களுக்கு முக்கியத்துவம் அளிக்கக்கூடிய வகையில் வருகிற 14ஆம் தேதி வேளாண் துறைக்குத் தனியாக நிதிநிலை அறிக்கை தாக்கல்செய்யப்படுகிறது.
வேளாண்மைக்குத் தனியாக முக்கியத்துவம் கொடுக்கும் வகையில் பட்ஜெட்டில் இயற்கை வேளாண்மை, உழவர் சந்தை, கிராம சந்தை, என உழவர்களின் வருவாயை உயர்த்தக்கூடிய வகையில் பல்வேறு அறிவிப்புகள் வெளியிடப்பட இருக்கிறது.
அதுமட்டுமின்றி நீர்ப்பாசனத்திற்குத் தனியாக ஒரு அமைச்சர் நியமனம்செய்யப்பட்டதன் மூலம் நிலத்தடி நீர் உயர்வு, சென்னையில் வெள்ளநீர் தேக்கம் பிரச்சினைக்குத் தீர்வு எனப் பல்வேறு அறிவிப்புகள் வெளியிடப்பட இருக்கின்றன.