சென்னை:சட்டவிரோத பணப் பரிமாற்ற தடைச் சட்ட வழக்கில், அமைச்சர் செந்தில் பாலாஜியை அமலாக்கத் துறையினர் கைது செய்து அழைத்துச் சென்றனர். அவ்வாறு அழைத்துச் சென்றபோது அவருக்கு நெஞ்சு வலி ஏற்பட்டதாகக் கூறி, முதலில் அவர் சென்னை ஓமந்தூரார் அரசு மருத்துவமனையில் அனுமதிக்கப்பட்டார்.
பின்னர், உயர் நீதிமன்ற தீர்ப்பின் அடிப்படையில், அவர் சென்னை ஆழ்வார்பேட்டையில் உள்ள காவேரி மருத்துவமனையில் அனுமதிக்கப்பட்டார். இதனிடையே, 15 நாட்கள் காவலில் எடுத்து விசாரிக்க அமலாக்கத் துறை தரப்பில் சென்னை முதன்மை அமர்வு நீதிமன்றத்தில் மனு தாக்கல் செய்யப்பட்டது.
இந்த வழக்கு தொடர்பான விசாரணை கடந்த இரண்டு நாட்களாக நடந்து வந்த நிலையில், நேற்று (ஜூன் 16) காவேரி மருத்துவமனையில் இருந்து அமைச்சர் செந்தில் பாலாஜி காணொளி காட்சி மூலம் காவல் துறையினர் ஆஜர்படுத்தினர். இதனையடுத்து, ஜாமீன் கோரிய செந்தில் பாலாஜியின் மனுவை தள்ளுபடி செய்து நீதிபதி அல்லி உத்தரவிட்டார்.
அதேநேரம், 15 நாட்கள் அமலாக்கத் துறையினர் காவல் கோரிய மனு தொடர்பாக செந்தில் பாலாஜியை 8 நாட்கள் காவலில் எடுத்து விசாரிக்க அனுமதி அளித்தும் உத்தரவிட்டார். இதன் அடிப்படையில் நேற்று முதல் வருகிற 23ஆம் தேதி மாலை வரை காவலில் எடுத்து விசாரித்து விட்டு, மீண்டும் மருத்துவமனையில் இருந்து காணொளி வாயிலாக ஆஜராக வேண்டும் எனவும் நீதிபதி அல்லி தனது உத்தரவில் தெரிவித்திருந்தார்.