சீமான் மீது தேசதுரோக வழக்குப்பதிய வேண்டும் - காங். எம்.பி. ஜெயக்குமார்

விக்கிரவாண்டி இடைத்தேர்தல் பரப்புரையில் நாம் தமிழர் கட்சி தலைமை ஒருங்கிணைப்பாளர் சீமான், ராஜிவ்காந்தி கொலையைப் பற்றி சர்ச்சைக்குரிய வகையில் பேசியதால் அவர் மீது தேசதுரோக வழக்குப்பதிய வேண்டுமென காங்கிரஸ் மக்களவை உறுப்பினர் ஜெயக்குமார் தெரிவித்துள்ளார்.

விக்கிரவாண்டி இடைத்தேர்தலில் பரப்புரையின்போது நாம் தமிழர் கட்சி தலைமை ஒருங்கிணைப்பாளர் சீமான், ராஜிவ்காந்தி கொலையைப் பற்றி சர்ச்சைக்குரிய வகையில் விமர்சித்தார். இதைத் தொடர்ந்து சீமானுக்கு எதிராக காங்கிரஸ் கட்சி கடும் எதிர்ப்பு தெரிவித்துவருகிறது. இந்நிலையில், காங்கிரஸ் மக்களவை உறுப்பினர் ஜெயக்குமார், இன்று தலைமைத் தேர்தல் அலுவலரிடம் சீமான் மீது புகார் அளித்தார்.

பின்னர் செய்தியாளர்களைச் சந்தித்த அவர், "தமிழ்நாட்டில் இரண்டு தொகுதிகளில் இடைத்தேர்தல் நடக்கிறது. தேர்தல் நடத்தை விதிமுறைகளை தேர்தல் ஆணையம் அறிவித்துள்ளது. ஆனால் நாம் தமிழர் கட்சியின் தலைமை ஒருங்கிணைப்பாளர் சீமான் விக்கிரவாண்டி தொகுதி தேர்தல் பரப்புரையில் அமைதியை சீர்குலைக்கும் விதத்தில் பேசியிருக்கிறார்.

குறிப்பாக, ராஜிவ்காந்தி கொலையைப் பற்றி சர்ச்சைக்குரிய வகையில் பேசியுள்ளார். இது கண்டனத்திற்குரியதாகும், இதனால் அவர் மீது சென்னை காவல் துறை இயக்குனரிடம் புகார் அளித்துள்ளேன். அதனைத்தொடர்ந்து, தற்போது தலைமைத் தேர்தல் அலுவலரை சந்தித்து புகார் மனு கொடுத்துள்ளேன். அதில், இடைத்தேர்தல் நடைபெறும் இரண்டு தொகுதிகளிலும் நாம் தமிழர் கட்சி வேட்பாளர்கள் தகுதி நீக்கம் செய்ய வேண்டும் என்று கேட்டுக் கொண்டுள்ளேன்" என்றார்.

இதையும் படிங்க:ராஜீவ் காந்தி கொலையை நியாயப்படுத்தி பேசிய சீமான் - காங்கிரஸார் புகார்