’உண்மையில் நான்தான் பிக்பாஸ்’ - சீமான் பரப்புரை

சென்னை: பணம் கொடுக்காமலேயே தனக்கு இவ்வளவு கூட்டம் வருகிறது எனவும், உண்மையில் தான்தான் பிக்பாஸ் எனவும் நாம் தமிழர் கட்சியின் ஒருங்கிணைப்பாளர் சீமான் தெரிவித்துள்ளார்.

திருவொற்றியூர் தொகுதிக்குட்பட்ட விம்கோ நகர், பாரத் நகர், சுனாமி குடியிருப்பு பகுதிகளில் நாம் தமிழர் கட்சியின் தலைமை ஒருங்கிணைப்பாளர் சீமான் பரப்புரை மேற்கொண்டார்.

அப்போது பேசிய அவர், "வருத்தம் தெரிவிப்பது மனித மாண்பு, இருப்பினும் இதுபோன்ற வார்த்தையை நான் என் அண்ணன் ராசாவிடமிருந்து எதிர்பார்க்கவில்லை. மிகப்பெரிய கல்வியாளர், வாசிப்பு பழக்கம் உடையவர், தன்மையாக பேசக்கூடியவர் தமிழ்நாடு முதலமைச்சர் வெல்லமண்டியில் வேலை செய்தார், குறைப்பிரசவத்தில் பிறந்தார் எனக் கூறுவதைக் கேட்டு அண்ணனா இப்படிப் பேசுகிறார் என்று அதிர்ச்சி அடைந்தேன். இவ்வளவு பண்பாடற்ற வார்த்தையை பயன்படுத்தி இருக்கக்கூடாது. எத்தனை ஆண்டு காலம் அரசியலில் பயணித்தவர், சிறு தடுமாற்றம்தான் இது" என்றார்.

எச். ராஜாவையும் ஆ.ராசாயும் எக்காரணத்தைக் கொண்டும் ஒப்பிடக்கூடாது, என் நாட்டைக் கைப்பற்றாவிடில் வேறொருவர் ஆட்சி அமைக்கும் பட்சத்தில் உலகத்தில் பிச்சை எடுத்தாவது நான் நினைத்ததை செய்வேன். பணம் கொடுப்பதில்லை. 234 தொகுதிக்குமானாவன் நான்.

பரப்புரைக்காக நான் எந்த வியூகமும் வகுக்கவில்லை. எதார்த்தவாதி. மக்கள் வாக்கு அளிப்பர் என்ற நம்பிக்கையில் பரப்புரை மேற்கொண்டு வருகிறேன். தமிழ்நாட்டில் ஒரே தலைவனுக்கு மட்டும்தான் தானாகக் கூட்டம் சேர்கிறது. மற்றவர்கள் பிரியாணிக்கு 300 ரூபாய் பணம் கொடுத்து கூட்டம் கூட்டி அரசியல் செய்கின்றனர்.

அவர்கள் எப்போதோ தோற்றுவிட்டனர்.பணம் கொடுக்காமல் இவ்வளவு கூட்டம் வருகிறது என்றால் 234 தொகுதிகளிலும் தனி சின்னத்தில் தனித்து போட்டியிடுகிறோம் என்றால் உண்மையிலேயே நான்தான் பிக்பாஸ்" என்றார்.

இதையும் படிங்க:’வரலாற்றுப் பிழையை மீண்டும் செய்யாதீர்கள், திமுக, அதிமுகவுக்கு மாற்றாக நாங்கள் இருக்கிறோம்’ - சீமான்