தமிழ்நாட்டில் கரோனா தொற்றுப் பரவலைக் கட்டுப்படுத்த தளர்வுகளற்ற முழு ஊரடங்கு கடைபிடிக்கப்பட்டு வருகிறது. இதனால் சென்னை முழுவதும் பொதுமக்கள் நடமாட்டத்தை கண்காணிக்க காவல்துறையினர் தீவிர வாகன சோதனையில் ஈடுபட்டு வருகின்றனர். அதன்படி கோட்டூர்புரம் சர்தார் படேல் சாலை கேன்சர் மருத்துவமனை அருகே, நேற்று இரவு 7 மணியளவில் போக்குவரத்து உதவி ஆய்வாளர் செல்வகுமார் தலைமையிலான காவலர்கள் வாகன சோதனையில் ஈடுபட்டிருந்தனர். அப்போது அந்த வழியாக வேகமாக வந்த சொகுசு காரை நிறுத்த முயன்றுள்ளனர். ஓட்டுநர் வாகனத்தை நிறுத்தவில்லை.
இதுகுறித்து மத்திய கைலாஷ் பகுதியில் பாதுகாப்பு பணியில் ஈடுபட்டிருந்த போக்குவரத்து உதவி ஆய்வாளர் லோகநாதனுக்கு தகவல் தெரிவிக்கப்பட்டது. லோகநாதன் தலைமையிலான காவலர்கள் உடனடியாக வாகன தடுப்புகள் அமைத்து, அதிவேகமாக வந்த சொகுசு காரை நிறுத்த முயன்றனர். ஆனால், ஓட்டுநர் தடுப்புகளின் மீது காரை மோதி தப்பிக்க முயன்றுள்ளார்.
பின்னர், காரை ஓட்டிய நபரை பிடித்த காவலர்கள், அவரிடத்தில் விசாரணை மேற்கொண்டனர். அதில், பிடிபட்ட நபர் துரைப்பாக்கத்தைச் சேர்ந்த ஹரேஷ் டி.ஜெத்வானி (55) என்பதும், அவர் அளவுக்கதிகமான போதையில் இருப்பதும் தெரிய வந்தது. அவர் தொலைத்தொடர்பு சம்பந்தமான பொருட்கள் உற்பத்தி செய்யும், ஈரோ ஸ்டார் நிறுவனத்தின் தலைவர் என்பதும் தெரியவந்தது. தடுப்பின் மீது கார் மோதியதால், ஹரேஷ் டி.ஜெத்வானிக்கு லேசான காயம் ஏற்பட்டிருந்தது. இதனால் அவர் ராயப்பேட்டை அரசு மருத்துவமனைக்கு சிகிச்சைக்காக அனுப்பி வைக்கப்பட்டார்.