உதயநிதியின் நிறுவனம் என்பதால் விசாரணையை முடக்குகிறாரா சங்கர் ஜிவால்? - சவுக்கு சங்கர் கேள்வி

உதயநிதிக்கு சொந்தமான நிறுவனம் என்பதால் நிறுவனத்தில் நிகழ்ந்த மரணம் தொடர்பாக நடவடிக்கை எடுப்பதில் காவல் துறையினரை சென்னை காவல் ஆணையர் சங்கர் ஜிவால் முடக்கி வைத்துள்ளாரா என சவுக்கு சங்கர் கேள்வி எழுப்பியுள்ளார்.

சென்னை மத்திய குற்றப்பிரிவு காவல் துறையினரால் பதிவு செய்யப்பட்ட நான்கு வழக்குகளில் பிரபல யூடியூபர் சவுக்கு சங்கருக்கு நீதிமன்றம் ஜாமின் வழங்கியுள்ளது. எனவே, ஜாமின் நிபந்தனைபடி, சவுக்கு சங்கர் தொடர்ந்து மத்திய குற்றப்பிரிவு அலுவலகத்தில் விசாரணை அலுவலர் முன்பு ஆஜராகி கையெழுத்திட்டு வருகிறார்.

இந்த நிலையில் ஜாமின் பெற்ற சவுக்கு சங்கர், இன்றும் (டிச.12) விசாரணை அலுவலர் முன்பு ஆஜராகி கையெழுத்திட்டார். இதனையடுத்து செய்தியாளர்களைச் சந்தித்த சவுக்கு சங்கர், “பிரபல நடிகர் சிவகார்த்திகேயனுக்கு சொந்தமான யூடியூப் சேனலை (பிளாக் ஷீப்), தற்போது உதயநிதி ஸ்டாலின் வாங்கியுள்ளார்.

மேலும் கதிர் டெலிவிஷன் பிரைவேட் லிமிடெட் என்ற பெயரில், சித்திரம் டிவி என்ற சேனலை தற்போதுள்ள யூடியூப் சேனலின் அலுவலகத்தில் விரைவில் தொடங்க உள்ளனர். இந்த நிலையில் யூடியூப் சேனல் அலுவலகத்தில் டெக்னீஷியனாகப் பணியாற்றி வந்த விஜயவாடாவைச் சேர்ந்த பாலாஜி, கடந்த டிசம்பர் 8ஆம் தேதி இரவு அலுவலக சர்வர் அறையில் உயிரிழந்துள்ளார்.

மதுப்பழக்கத்தால் மாரடைப்பு ஏற்பட்டு அவர் உயிரிழந்துள்ளதாக காவல் துறையினர் தெரிவித்துள்ளனர். இச்சம்பவம் தொடர்பாக கோடம்பாக்கம் காவல் துறையினர் சந்தேக மரணம் என்ற பிரிவில் வழக்குப்பதிவு செய்துள்ளனர். ஆனால், வழக்குப்பதிவு செய்து நான்கு நாட்கள் ஆகும் நிலையில், அந்த மரணம் தொடர்பாக தற்போது வரை சம்பவ இடத்துக்குச் சென்று காவல் துறையினர் தடயங்களை சேகரிக்கவோ அல்லது மாரடைப்பு காரணமாகத்தான் பாலாஜி உயிரிழந்தாரா என்பதை உறுதி செய்யும் வகையில் விசாரணை நடத்தவோ இல்லை.

அதுமட்டுமல்லாமல் யூடியூப் சேனலின் அலுவகத்தில் உள்ள அன்றைய நாளுக்கான அனைத்து சிசிடிவி பதிவுகளையும் அந்த நிறுவனத்தார் அழித்துள்ளனர். இது தடயங்களை அழிக்கும் சட்ட விரோதச் செயல். இதையும் காவல் துறையினர் கண்டுகொள்ளவில்லை.

மேலும் உயிரிழந்த பாலாஜியின் மனைவி விஜயவாடாவில் இருந்து வந்து, அவரது உடலை சொந்த ஊருக்குக் கொண்டு சென்றுவிட்டதால், அவரது குடும்பத்தாரை என்னால் தொடர்பு கொள்ள முடியவில்லை. சந்தேக மரணம் என வழக்குப்பதிவு செய்தும், உதயநிதிக்கு சொந்தமான நிறுவனம் என்பதால் காவல் துறையினர் இதுவரை அங்கு விசாரணை நடத்தச் செல்லவில்லையா?

காவல் துறையினரை விசாரணை செய்யவிடாமல் சென்னை காவல் ஆணையர் சங்கர் ஜிவால் முடக்கி வைத்துள்ளாரா? பாலாஜியின் உயிரிழப்பைக் கொலை எனக் கருதவில்லை. சந்தேக மரணம் ஒன்று நடந்தால் அதை விசாரிக்கும் கடமையுள்ள காவல்துறை, இன்னும் தனது பணியை செய்யாமல் இருப்பதற்கு என்ன காரணம் என்று மட்டுமே கேள்வி எழுப்புகிறேன்.

சட்ட விரோதமாக தடயங்களை அழிக்கும் வகையில், சிசிடிவி பதிவுகளை அழிக்கும் உரிமையை சம்பந்தப்பட்ட யூடியூப் நிறுவனத்தாருக்கு யார் கொடுத்தது? அவர்கள் மீது உரிய சட்டப் பிரிவுகளின்கீழ் வழக்குப்பதிவு செய்ய வேண்டும்” எனத் தெரிவித்துள்ளார்.

இதையும் படிங்க:உதயநிதியை எதிர்த்து சவுக்கு சங்கர் போட்டியிட்டால் ஆதரிப்போம்- சீமான் அதிரடி