மதுரை பின்னணியில் சரத்குமார், கௌதம் கார்த்தி நடிக்கும் க்ரைம் த்ரில்லர் படம்!

தட்சிணாமூர்த்தி ராமர் இயக்கத்தில், சாம் CS இசையில் சரத்குமார், கௌதம் கார்த்திக் இணைந்து நடிக்கும் புதிய க்ரைம் திரில்லர் திரைப்படத்தின் படப்பிடிப்பு, இந்த மாதத்தில் தொடங்கப்படவுள்ளது.

சென்னை:ஐபி கார்த்திகேயன், முரளிகிருஷ்ணா வங்கயாலபதி, வெங்கட ஸ்ரீனிவாஸ் பொக்ரம் ஆகியோர் இணைந்து சரத்குமார், கௌதம் கார்த்திக் நடிப்பில் மிகப்பெரிய பட்ஜெட்டில் மதுரை பின்னணியில் ஆக்‌ஷன் க்ரைம் த்ரில்லர் திரைப்படத்தை தயாரிக்க உள்ளனர். இப்படத்தை தட்சிணாமூர்த்தி ராமர் இயக்குகிறார். அரவிந்த் சிங் ஒளிப்பதிவு செய்கிறார். சாம் CS இசையமைக்கிறார். ’புரொடக்‌ஷன் நம்பர் 9’ எனத் தற்போது அழைக்கப்படும் இத்திரைப்படத்தின் படப்பிடிப்பு இம்மாதம் முதல் தொடங்கப்படவுள்ளது.

வெங்கட ஸ்ரீனிவாஸ் பொக்ரம் தெலுங்கில் 'கார்த்திகேயா', 'காதலோ ராஜகுமாரி' போன்ற படங்களைத் தயாரித்தவர். தற்போது தமிழில் சரண்யா பொன்வண்ணன் மற்றும் ராஜ் வர்மா நடிப்பில் 'கேங்க்ஸ்டர் கிரானி' (Gangster Granny) என்ற படத்தைத் தயாரித்து வருகிறார்.

சரத்குமார், கௌதம் கார்த்தி நடிக்கும் க்ரைம் த்ரில்லர் படம்

சரத்குமார், கௌதம் கார்த்திக் நடிக்கும் படத்தின் இயக்குநர் தட்சிணாமூர்த்தி ராமர் கூறும்போது, "கௌதம் கார்த்திக், சரத்குமார் சார் போன்ற அர்ப்பணிப்புள்ள நடிகர்களுடன் பணியாற்றுவது எனது கனவு நனவான தருணம். அவர்களின் ஆர்வமும், அர்ப்பணிப்புமிக்க திறமையும் கலந்த நடிப்பில், சினிமா அரங்குகள் கூஸ் பம்ப்ஸ் தருணங்களால் நிரம்பி வழியும் என்று நான் நம்புகிறேன்.

திரையுலகில் சரத் சாரை ரசித்து வளர்ந்த நான், அவருடன் பணிபுரியும் வாய்ப்பு கிடைக்கும் என்று நினைக்கவே இல்லை. நான் குறிப்பிட்ட கதாபாத்திரத்தை எழுதும்போது கூட, சரத் சாரை மனதில் வைத்திருந்தேன். ஆனால் அவர் என் படத்தில் நடிக்க ஒப்புக்கொள்வாரா என்று உறுதியாகத் தெரியவில்லை. கதையை விவரித்தவுடனே படத்தில் நடிக்க ஒப்புக்கொண்டு ஆச்சர்யம் தந்தார்" என்றார்.

சரத்குமாரின் கதாப்பாத்திரம் குறித்து அவர் மேலும் கூறுகையில், "இதுவரை சரத் சார் தனது படங்களில் நேர்மையான போலீஸ் வேடத்தில் நடித்ததை பார்த்திருக்கிறோம். ஆனால் இந்தப்படத்தில் அவர் மதுரையில் வாழும் ஒரு போலீஸ் அலுவலராக மதுரை வட்டார வழக்கு மொழியுடனும், உடல்மொழியுடனும் அவரது முந்தைய பாத்திரங்களிலிருந்து முற்றிலும் மாறுபட்ட பாத்திரமாக நடிக்கவுள்ளார்" என்று தெரிவித்தார்.

இதையும் படிங்க: ரசிகர் கூட்டத்தில் சிக்கிய நயன்தாரா-மீட்டுச் சென்ற விக்னேஷ் சிவன்