அதிமுக மாவட்டச் செயலாளர் தம்பி வெட்டிக்கொலை!

சென்னை: ஆவடி அருகே அதிமுக மாவட்டச் செயலாளர் தம்பியை அடையாளம் தெரியாத நபர்கள் பட்டப்பகலில் வெட்டிக் கொலை செய்தனர். காவல் துறையினர் கொலையாளிகளை தீவிரமாகத் தேடிவருகின்றனர்.

சென்னை ஆவடியை அடுத்த திருமுல்லைவாயல் மூன்றாவது நகரில் வசித்து வந்தவர் சந்தோஷ்குமார்(26). அதிமுக மாவட்டச் செயலாளர் தம்பியான இவர், நேற்று காலை வீட்டின் அருகே உள்ள பள்ளியில் தனது மகனை விட்டுவிட்டு வீடுதிரும்பியபோது, அடையாளம் தெரியாத நபர்கள் அவரை சரமாரியாக வெட்டினர்.

அதில் தலை, கழுத்து, கை உள்ளிட்ட பல இடங்களில் அவர் படுகாயமடைந்தார். இதைக்கண்ட பொதுமக்கள் உடனடியாக காவல்துறையினருக்கு தகவல் தெரிவித்தனர். சம்பவ இடத்திற்கு வந்த காவல்துறையினர், அவரை மீட்டு அரசு மருத்துவமனைக்கு அனுப்பிவைத்தனர்.

பின்னர் தீவிர சிகிச்சைப் பிரிவில் இருந்த சந்தோஷ்குமார், இன்று சிகிச்சை பலனின்றி உயிரிழந்தார். சந்தோஷ்குமார் மீது கொலை முயற்சி வழக்கு உள்ளிட்ட 44 வழக்குகள் நிலுவையில் உள்ள நிலையில், முன்விரோதம் காரணமாக அவர் படுகொலை செய்யப்பட்டிருக்கலாம் என்ற கோணத்தில் காவல்துறையினர் விசாரணை நடத்தி வருகின்றனர்.

இதையும் படிங்க: நெல்லை மேயர் கொலை வழக்கு: மேலும் இருவர் கைது!